Ubuyobozi bw’akarere ka Ruhango bukavuga ko bwishimira cyane uruhare rw’umuryango Food For The Hungry, ugira mu kuzamura abaturage cyane cyane abari mu byaro bikiri inyuma mu iterambere.

Umuyobozi w’akarere ka Ruhango wungirije ushinzwe imari n’iterambere, Twagirimana Epimaque, yavuzeko uyu muryango utandukanye n’abandi bafatanyabikorwa basanzwe bakorana, kuko uyu wo ugenda ukareba ba baturage koko babaye cyane kandi bakahava haricyo bamaze kwigezaho.

Umuryango Food For The Hungry, ukora ibikorwa biteza imbere abaturage mu Rwanda guhera mu mwaka 1994, ukaba waratangiye gukorana n’akarere ka Ruhango guhera mu 2012.

Abanyeshuri biga muri iki kigo cya Gaseke nabo bagaragaje ibyishimo bavuga ko imyigire yabo igiye kuba myiza kurushaho.

Umwe yagize ati “ikidushimishije ni intebe nshya kuko izindi zari zishaje kuburyo zahoraga zigusha abana, ikindi hari ubwo itegura ryamanukaga rigakubita umwana mu mutwe, ariko ubu turizera ko bitazongera”.

Uretse aba banyeshuri, ababyeyi nabo bavuze ko hari byinshi bishimira kuko hari ibyo bemerewe n’uyu muryango, harimo nko guhabwa inka zigera kuri 15, gufashwa mu buhinzi ndetse no kuba bishyurirwa ubwisungane mu kwivuza bw’abana babo.

Russel Mushanga, umuyobozi wa Food For The Hungry mu Rwanda, avuga ko itarambere rirambye ari rishingiye ku bene gihugu, kandi ngo iterarmbere rirambye rikaba ari irishingiye ku ireme ry’uburezi ari nayo mpamvu ibikorwa byabo bishingira ku burezi.

Uyu muryango ukorera mu turere 6 tw’igihugu, aritwo Gatsibo, Nyagatare, Bugesera, Kamonyi, Muhanga na Ruhango. Mu karere ka Ruhango umaze kuhakora ibikorwa bifite agaciro ka miliyoni 360 z’amafaranga y’u Rwanda.

Eric Muvara