Minisitiri Biruta yagize ati “Ibikorwa bikorerwa muri iki kigo ni ibintu umuturage aba akeneye mu buzima bwa buri munsi. Urugero nabonye ibicanwa bikoranye ubuhanga bitangiza ibidukikije, kandi bikagabanya gukoresha ibicanwa byinshi. Ibi byose twabiganiriyeho kandi bizatanga umusaruro ku baturage batuye mu nkengero z’iki kigo.”

Minisitiri w’uburezi yeretswe byinshi mu bikorerwa muri iki kigo, anabwirwa ibibazo bitandukanye biri muri iki kigo, birimo kuba bakeneye umuhanda ugera ku kigo, kuko uhari utameze neza.

Yijeje ubuyobozi bw’iki kigo ko minisiteri y’uburezi igiye gukoresha ibishoboka byose ,ibi bibazo bigakemuka mu buryo bwihuse.

Umuyobozi w’ikigo Tumba College of Technology, Gatabazi Pascal, yagize ati “Twashimishijwe cyane n’uruzinduko rwa minisitiri, yaduhaye impanuro, hatanzwe ibibazo byinshi kandi bimwe yabashije kubisubiza,n’ibindi byasigaye yatwijeje ko bigiye gukemuka vuba”.

Mu nama Minisitiri w’uburezi yagiriye ubuyobozi bwa Tumba College of Technology harimo kugeza ku baturage baturanye ubumenyi bigisha nabo bukabagirira akamaro.

Yakomeje avuga ko hari imbogamizi z’imyumvire y’abaturage, imbogamizi z’umuhanda udatunganyije ugasanga n’abaturage bakagombye kuza kwiga ubumenyi batabashije kuhagera.

Ikindi kibazo bafite ngo ni icy’uko bashaka kwagura ikigo bityo bakaba basaba ubuyobozi ko bwabafasha kubona uko bishyura abaturage bashaka kugurira aho bazubaka.

Ikigo Tumba College of Technology kigamo abanyeshuri 600, mu ma shami atatu: computer science, Electronics na telecommunication n’ibijyanye n’ingufu (altenative energy).

Hortense Munyantore