Muri iki gikorwa cyaberaga mu Murenge wa Gashora ho mu Karere ka Bugesera aho iri shuri ryubatse kuri uyu wa 4 Ukwakira 2013, Perezida Kagame yashimye ababyeyi bagira uruhare mu burere bw’abana babo.

Yagize ati “si imiryango cyangwa inshuti zanyu zonyine zishimira iki gikorwa cy’uyu munsi ahubwo ni igihugu cyose muri rusange, iri shuri rya Gashora ni umusingi w’ubumenyi buzabafasha mu buzima bwanyu bwose”.

Umukuru w’igihugu yanabwiye aba banyeshuri ko iyi ari intambwe bateye kandi ko igihugu kibatezeho amaso mu iterambere ndetse ko urugendo aribwo rugitangira.

Ati “Ubumenyi n’ikoranabuhanga nibyo igihugu cyacu gitezeho iterambere, mu myaka 20 ishize hakozwe byinshi mu guhindura imyumvire y’Abanyawanda, intera ubu tugezeho ntitwifuza ko yasubira inyuma”.

Umukuru w’igihugu yanashimiye kandi abagize igitekerezo cyo gushinga iri shuri aribo; Shalisan Foster na Suzanne McGill bakomoka mu gihu cya Leta zunze ubumwe z’Amerika batekereje ku burere n’uburezi bw’umwana w’umukobwa.

Umuyobozi w’ishuri ry’ubumenyi n’ikoranabuhanga rya Gashora, Peter Thorp, mu ijambo rye yashimye Leta y’u Rwanda idahwema guteza imbere uburere n’uburezi bw’umwana w’umukobwa. Yagize ati “aba bana ipfundo ry’ubumenyi n’ubufatanye hagati yabo niryo rizabaherekeza aho bazajya hose .”

Nishimwe Janviere ni umwe mu banyeshuri bitegura gusoza amasomo muri iri shuri, avuga ko abana b’abakobwa badakwiye kwitinya banga kwiga ibijyanye n’ubumenyi n’ikoranabuhanga.

Yabisobanuye muri aya magambo: “Numva ku bwanjye nzaba umuganga nanjye nkagira uruhare mu iterambere ry’igihugu cyanjye kandi ibyo nzakura aha niteguye kuzabitangamo umusanzu nubaka igihugu cyanjye”.

Umwe mu babyeyi barerera muri iri shuri witwa Nisunze Marie Donatha yishimiye uburezi abana b’abakobwa bahabwa muri icyo kigo, kuko uretse kuhakura ubumenyi bwo mu ishuri bigishwa n’ibijyanye n’umuco.

Ishuri ry’abakobwa ry’ ubumenyi n’ikoranabuhanga rya Gashora ryatangiye mu mwaka wa 2011 rifite inshingano yo guteza imbere uburere bw’umwana w’umukobwa.

Egide Kayiranga