Aya marerero umunani yubatswe mu mirenge itatu y’icyaro ariyo umurenge wa Rweru, Ngeruka na Kamabuye.

Abaturage barashima ko n’iterambere ritagarukira mu mijyi gusa dore ko inyubako z’ayo marerero zigizwe n’ibikoresho birambye, harimo ishuri, igikoni ndetse n’ubwiherero n’ibikinisho by’abana bigezweho, nk’uko bivugwa na Safari Eliezel umwe mu baturage bo mu kagari ka Nkanga mu murenge wa Rweru hamwe mu hubatswe iryo rerero.

Yagize ati “iri rerero rije gukemura ikibazo cy’abana birirwaga bandagaye hano mu mudugudu bakiri bato, kuko ababyeyi babo babasigaga bakajya mu murima ntawubareba, ibyo bigatuma bagira impungenge ku buzima bwabo. Ariko ubu bazajya bajya mu mirimo yabo batekanye kuko bizeye aho basize abana babo”.

Ikindi ngo iri rerero rije gukemura ikibazo cy’isuku nke yagaragaraga mu bana kuko bazitabwaho ndetse bizanabafasha gutangira amashuri bafite ubumenyi bw’ibanze bitandukanye na mbere, nk’uko bivugwa na Mukankusi Venantie.

“kuba tubonye iri rerero bizadufasha mu burere bw’abana bacu kuko mbere bajyaga gutangira batabanjye kwiga ikiburamwaka ariko ubu bazajya mu mashuri abanza babanje kubona ubumenyi bw’ibanze”.

Iryo rerero ryo mu kagari ka Nkanga mu murenge wa Rweru ku ikubitiro hahise hiyandikinsha abana bari hagati y’umwaka kugeza ku myaka itandatu.

Umuyobozi w’akarere ka Bugesera wungirije ushinzwe imibereho myiza y’abaturage, Madame Uwiragiye Pricille niwe washyikirijwe amarerero yubatswe n’umuryango Plan International Rwanda, akaba yawushimiye inkunga utanga mu rwego rw’uburezi.

“aya amarerero yuzuye azongera umubare w’abana biga amashuri y’incuke kuko twari dufite umubare muke ariko bizatuma wiyongera”.

Murisa James ni umuyobozi wa Plan International Rwanda yasabye ababyeyi kuzafata neza ibyo bikorwa babagejejeho, ikindi kandi avuga ko bagomba gufatanyiriza hamwe maze bakazahakora ibikorwa bitandukanye birimo nko kubaka uruzitiro no guteramo ibyatsi.

Egide Kayiranga