Aba banyeshuri bibukijwe ko ubuzima bagiyemo butandukanye n’ubw’ishuri, basabwa kwitabira isoko ry’umurimo ariko bakanakomeza kwihugura kuko isi ikomeje guhinduka, nk’uko byatangajwe na Minisitiri wa Leta ushinzwe ubumenyi ngiro, Albert Nsengiyumva.

Calixte Kabera, umuyobozi wa RTI (Rwanda Tourism Institute) yatangaje ko aba banyeshuri bakomeza gusohoka bagiye kunganira imitangire inoze ya serivisi, nyuma y’uko mu myaka yashize mu Rwanda iki kibazo cyakomeje kuba ingorabahizi.

Abayobozi bakuru mu burezi nibo bari bitabiriye gutanga impamyabumenyi ku banyeshuri barangije muri RTI.

Ati "Inyigo iherula ya vuba yerekanye yuko ugutanga serivisi mu Rwanda kwavuye kuri 50% ubu tukaba tugeze hejuru ya 70%. Ibyo ni ibigaragaza ko ku nshuro ya kabiri dusohoye abanyeshuri ko uruhare rwa RTI mu gutanga serivisi rwiyongera.

Ku buryo twizera ko mu minsi iri imbere (...) nitumara gusohora abantu beshi bujuje ibikenewe ku isoko ry’umurimo, turizera ko u Rwanda ruzaba kimwe mu bihugu bitanga serivisi nziza."

Bmwe mu banyeshuri barangije, biganjemo abasanzwe bakora mu mahoteli n’abaresitora bitandukanye byo mu Rwanda, batangaje ko bateganya kwihangira imirimo bitewe n’ubunararibonye n’ubumenyi bakuye muri iri shuri.

Abanyeshuri bisihimira ko basoje amasomo yabo.

Uwitwa Innocent Hagenimana yatangaje ko aho bifuza kugera ari aho bazaba bashobora gushyira mu bikorwa ibyo bize ariko bikorera. Ibyo bikazanabafasha no kwihangira udushya.

Iri shuri risanzwe rikorana n’ikigo gishinzwe guteza imbere kwihangira imirimo no kuyitera inkunga. Abanyeshuri benshi bakaba bizera ko kizabafasha kugira imishinga yabo bakayibyaza umusaruro.

Emmanuel N. Hitimana