Ako kagari gafite ishuri ribanza ariko bitewe n’imiterere ya ko abana batuye mu gice kimwe cya ko ngo bakora urugendo rw’ibirometero bigera kuri bine bajya kwiga kandi bamanuka umusozi bakazamuka undi.

Ababyeyi b’i Rugendabari bavuga ko abana ba bo bananizwa n’urugendo bakora bagiye kwiga.

Urwo rugendo ngo ni rwo ruca intege bamwe bakanga ishuri n’ubwo baba barigiyemo barikunze nk’uko bamwe mu babyeyi twavuganye babyemeza.

Mukashyaka wo mu mudugudu wa Gikumba agira ati “Bagenda babiharaye bamara kunanirwa ukabona bacitse intege rwose. Urajyana umwana i Rutare [ahari ishuri] yagaruka n’inzara n’agasozi amanuka n’ako azamuka ukamukubitira gusubirayo ahubwo akiruka ukanamubura.”

Abana bakiri bato cyane cyane abajya gutangira mu wa mbere w’amashuri abanza urwo rugendo ngo rurabananiza bagataha barira nk’uko Nyirahabimana Emerance wo mu mudugudu wa Rugendabari muri ako kagari abivuga.

Ababyeyi b’i Rugendabari bavuga ko abana ba bo bananizwa n’urugendo bakora bagiye kwiga.

Ababyeyi batuye muri aka gace bavuga ko bahorana impungenge z’uburezi bw’abana ba bo kubera urwo rugendo rurerure bakora bagiye kwiga. Bavuga ko babonye amashuri hafi baruhuka, umubyeyi yajya ajya mu tundi turimo agatuza.

Ubuyobozi bw’umurenge wa Mukarange ako kagari kabarizwamo buvuga ko ikibazo cy’abo bana kizwi. Gusa umunyamabanga nshingwabikorwa wa wo Mukandoli Grace avuga ko kirenze ubushobozi bw’umurenge. Cyakora ngo bakigejeje ku buyobozi bw’akarere ka Kayonza banasaba ko cyashyirwa mu byihutirwa bizakorwa mu ngengo y’imari y’umwaka wa 2015/16.

Uretse kuba akagari ka Rugendabari gafite ikibazo cy’ishuri, gasa n’akasigaye inyuma n’ubwo kabarizwa mu murenge ufatwa nk’umujyi w’akarere ka Kayonza. Gusa umukozi w’akarere ushinzwe uburezi Namara Charles avuga ko biteganyijwe ko umwaka utaha i Rugendabari hazubakwa nibura ibyumba bitatu by’amashuri abanza mu rwego rwo korohereza abo bana.

Cyprien M. Ngendahimana