Sosiyete Pixel Corps ivuga ko yaje gutangiza ishuri rya filimi mu Rwanda ryitwa Africa Digital Media Academy (ADMA), kubera umuhate Leta y’u Rwanda ifite mu guteza imbere ikoranabuhanga, no gushaka ibisubizo ku bushomeri bwibasiye urubyiruko muri iki gihe.

“Iri shuri rizaba ari intangarugero muri Afurika, rikazafasha Abanyarwanda n’abandi baturage bo muri Afurika y’uburasirazuba bazaryigamo, gushora ibihangano byabo ku masoko mpuzamahanga”, nk’uko umuyobozi wa Pixel Crops, Alexander Lindsay yatangaje.

Ni ishuri rizakora filime ziri ku rugero rw’izikorwa n’Abanyamerika

Umuyobozi w’ikigo WDA, Jerome Gasana, avuga ko Abanyarwanda bagiye kuva ku gukora filimi zitabasha gutandukanywa n’ikinamico, kandi zikorwa hatagamijwe kuzishora ku masoko yo hanze.

Yagize ati: “Urwego rwa filimi zikorwa n’Abanyamerika si rwa rundi umuntu ajya gufata amashusho y’umuntu ugenda mu muhanda cyangwa uhanuka ahantu hareshya na metero imwe, ahubwo umuntu ashobora kugenda intambwe imwe bakiyituburamo nyinshi kandi ishusho ye bakayifata itagaragaza aho aherereye….”.

“Aho umuntu ahubuka mu ndege hejuru cyane akagera hasi akiri muzima, kandi atari ko byagenze”, ibi byose Abanyarwanda bazabyigira hano mu gihugu, nk’uko Umuyobozi wa WDA Gasana yasobanuye.

Ikiguzi cyo kwiga muri iryo shuri rya ADMA riri mu mujyi wa Kigali, imbere y’aho sosiyete y’ubwishingizi SORAS ikorera, ntabwo kirumvikanywaho n’impande zombi (WDA na Pixel).

Icyakora ngo uryiga agomba kuba azi urimi rw’icyongereza cyangwa akabifatanya no kwiga gukora sinema, hakiyongera ho ubushake ndetse n’intego zo kuzabyaza umusaruro ibyo yize.

Simon Kamuzinzi