Aba banyeshuri bavuga ko baza kwiyandikisha, babwirwaga ko hari amashami agera ku icyenda, ndetse umuntu akaba afite uburenganzira bwo guhitamo iryo ashaka nyamara ngo nyuma aya mashami yaje kugabanywa hasigara ane gusa.

Hasigaye amashami y’Ubukerarugendo, Ikoranabuhanga, ubuhinzi n’ubwubatsi, buri munyeshuri akagomba guhitamo muri aya gusa.

Said Nsengimana avuga ko yaje kwiga agamije kongera ubumenyi kugirango abashe gukomeza umwuga we wo kwigisha. Gusa ngo yaje gutungurwa abonye ishami ry’ubwarimu rivanywe mu mashami azahigishirizwa.

Mu igorofa rya gatatu y’ino nyubako niho ishami rya Musanze rya CIP rikorera.

Yassin Nsengimana, avuga ko impamvu bahabwaga ari uko iri shuri ari iry’imyuga, bityo ngo amashami adafite aho ahuriye n’imyuga agomba guhagarara. Nyamara ngo ibi bisobanuro ntibyabanyuze, habe n’ubwo umuyobozi mukuru w’ishuri yazaga kubibasobanurira.

Aba banyeshuri, bavuga ko n’ubwo ntacyo bashoboraga gukora, bemeye bakiga ibihari, kuko bari baramaze gutanga igice kimwe cy’amafaranga y’ishuri yose agera ku bihumbi 150. Gusa ngo nta n’ubwo bari babasha gushyira mu ngiro ibyo biga, kuko nta bikoresho bafite.

Iri shuri ryaje guhagarikwa

Mu ibaruwa iboneka ku cyicaro cy’iri shuri, iriho umukono w’umuyobozi waryo Prof. Philip Brierley kuva tariki 06/05/2013, ngo ishuri ribaye rifunze imiryango kubera gutakaza uburenganzira bwo gukora, abanyeshuri bakazamenyeshwa igihe amasomo azatangiriza bongeye guhabwa uburenganzira.

Abanyeshuri bavuga ko aribo ba mbere bagiye kubirenganiramo, kuko umwaka w’amashuri utazabategereza, kandi bakaba bazi neza ko ubumenyi baje guhabwa batari kububona nyamara barishyuriye ku gihe.

Said Nsengimana wigaga mu mwaka wa mbere muri iri shuri, yagize ati : «Bazadusubize amafaranga twishyuye tujye ahandi kuko iri siryo shuri ryonyine riba mu gihugu».

Iyi baruwa niyo yandikiwe abanyeshuri babwirwa ko amasomo abaye ahagaze.

Ubuyobozi bw’ikigo cy’igihugu gishinzwe guteza imbere ubumenyi ngiro, buvuga ko bwandikiye iri shuri burisaba guhagarika ibikorwa, kubera kutuzuza ibisabwa. Ngo iri shuri ryegereye iki kigo mu kwezi kwa 12 umwaka ushize wa 2012 ribusaba uburenganzira bwo gukora, maze babwirwa ko nibuzuza ibisabwa bazatangira bagakora nta kibazo.

Aho kuzuza ibisabwa birimo ibikoresho, za laboratoire, bibliotheque n’amashuri, iri shuri ryahise ritangira kwakira abanyeshuri. Ibi rero bikaba aribyo byatumye riba rihagaritswe by’agateganyo.

Jean Noel Mugabo