Uyu muyobozi yemeza ko iri shuri rifasha abanyeshuri mu kubigisha amasomo ateza imbere icyaro kandi abaturage baturanye na ryo bakongererwa ubumenyi bubashoboza guteza imbere ubuhinzi n’ubworozi bakora.

Ndashimye Leonce, Umuyobozi wa EAV-NTENDEZI.

EAV Ntendezi iri mu mudugudu wa Kacyiru, akagari ka Ntendezi, umurenge wa Ruharambuga mu karere ka Nyamasheke. Ni ishuri bigaragara ko rigizwe n’inyubako zikomeye kandi rikaba rikikijwe n’ibikorwa by’ubuhinzi hafi hagaragara, iyo urigezemo.

Umuyobozi w’iri shuri, yemeza ko kuva iri shuri ritangiye kwigisha iby’ubuhinzi n’ubworozi mu mwaka w’1993ryagize uruhare rugaragara mu guteza imbere ubuhinzi n’ubworozi mu Rwanda, ariko by’umwihariko mu karere ka Nyamasheke iri shuri riherereyemo.

Uyu muyobozi akomeza avuga ko iri shuri rifasha cyane mu iterambere ry’icyaro kuko abanyamwuga ryigisha, mu buhinzi n’ubworozi baba bagomba gukorana n’abaturage b’abahinzi n’aborozi kandi iyi mirimo ikaba ubusanzwe ikorerwa mu bice by’icyaro.

Ishuri rya EAV-NTENDEZI ryatangijwe mu mwaka w’1993 rifite amashami y’Ubuhinzi n’Ubworozi. Icyo gihe amashami cyangwa se “section” mu mashuri yatangiriraga mu mwaka wa mbere w’amashuri yisumbuye.

Ishuri rya EAV-NTENDEZI riri mu murenge wa Ruharambuga mu karere ka Nyamasheke.

Nyuma haje kwiyongeraho amashami y’Ibinyabuzima n’Ubutabire (Bio-Chimie) ndetse n’Imibare n’Ubugenge (Math-Physique).

Abanyeshuri ba nyuma bo muri aya mashami y’ubumenyi (Sciences) ndetse n’icyiciro rusange barangije muri EAV Ntendezi muri uyu mwaka urangiye wa 2012.

Iri shuri rikaba risigaranye amashami y’Ubuhinzi, Ubworozi ndetse n’iry’Icungamutungo (Comptabilité) ryatangiye muri uyu mwaka wa 2012.

Emmanuel Ntivuguruzwa