Kuva ikibazo cy’ubucucike mu mashuri ya Munanira na Kinogo cyagaragazwa n’inama njyanama y’akarere ka Rubavu mu kwezi kwa Nyakanga, ubuyobozi bw’akarere ka Rubavu bwihutiye gushakira abana biga muri aya amashuri intebe.

Nubwo izimaze kuboneka zidahagije, umuyobozi w’umurenge wa Busasamana, Kazendebe Heritier, atanga ikizere ko umwaka wa 2014 abana bazabona intebe zo kwicaraho, abana bakareka kwicara ku mabuye no gucucikwa ku ntebe nkuko ubu biri ku mashuri ya Kinogo na Munanira.

Bagiye kureka kwica bacucikiranye nyuma yo kubona intebe.

Ibigo by’amashuri ya Munanira acyeneye nibura intebe 197 mu gihe amashuri ya Kinogo acyeneye intebe 173. Kugeza ubu intebe 100 nizo zamaze kugera ku mashuri y’ibi bigo, mu gihe izindi zigera kuri 400 zigikorwa.

Ikigo cya Kinoga kimaze imyaka 14 cyubatswe, abanyeshuri bakigaho ni 1223 bigira mu byumba 20 bifite intebe 149 bigatuma abana bicara bacucitse naho abandi bakicara ku mabuye kuko intebe ari nke.

Uretse kuba abana bicara babangamiwe, umurezi wigisha kuri iki kigo Kambali Leonard avuga ko abana bo mu mashuri y’uwa mbere n’uwa kabiri bicaraga ku mabuye naho abari muwa kane n’uwa gatanu bakicara ari bane cyangwa batanu ku ntebe kugira ngo bashobore kwiga.

Abana bigaga babyigana ku ntebe ku bigo bya Munanira na Kinogo.

Cyakora nko ibi bibangamira imyigire y’abana kuko badashobora kandika neza kimwe no gukurikira kuko barambirwa vuba cyagwa impapuro bandikaho zigatoboka kuko ntacyo bafatira.

Sylidio Sebuharara