Icyo kigo cy’amashuri giherereye ahantu h’icyaro kigizwe n’amashuri abanza ndetse n’ay’uburezi bw’ibanze bw’imyaka icyenda (9YBE). Gusa abiga muri 9YBE baracyari mu wa mbere.

Manirafasha Jean de la Paix uyobora icyo kigo avuga ko guhera mu mwaka wa 2008 ababyeshuri barangije amashuri abanza muri icyo kigo batsinda 100%. Bivuga ko batsinda bose nta n’umwe uvuyemo.

Abanyeshuri biga muri G.S. Musasa batozwa kuvuga no kumva icyongereza aribyo bibafasha gutsinda cyane.

Akomeza avuga ko yishimira umusaruro bakura mu mbaraga baba bashyize mu kwigisha. Ngo ariko bimushimisha kurushaho iyo abonye muri abo bana batsinze, havuyemo benshi bahawe amabaruwa ababwira ko bagiye mu bigo Leta yateganyije bifite “internat”.

Mu mwaka wa 2012, abanyeshuri 42 barangije amashuri abanza muri Groupe Scolaire Musasa batsinze bose. Muri bo havuyemo 17 babonye amabaruwa abemerera kujya mu bigo bya Leta bifite “internat”.

G.S.Musasa ifite amashuri y’ibanze y’imyaka icyenda. Abayigamo bari mu wa mbere gusa.

Umuyobozi wa Groupe Scolaire Musasa asobanura ko hari ibindi bigo bitsindisha abana 100% ariko ngo ikigo ayobora nicyo kigira abana benshi bahabwa amabaruwa yo kujya kwiga mu bigo Leta yateganyije bya “internat”. Aho ngo niho ngo niho abarira ko koko yabaye uwa mbere mu karere (Burera).

Akomeza avuga ko abo banyeshuri baba bagiye kwiga mu mashuri yisumbuye batsinda mu buryo bushimishije.

Ibanga bakoresha

Manirafasha yatangarije Kigali Today ko icya mbere gituma ikigo ayobora gitsinda neza ari ubufatanye buri hagati y’ubuyobozi bw’ikigo, abarimu ndetse n’ababyeyi b’abanyeshuri, aho bumva ko umurimo bakora ari uwabo, bashyira mu bikorwa ibiba byarateganyijwe umwaka wose.

G.S.Musasa imaze imyaka itanu ikurikirana itsindisha abanyeshuri ijana ku ijana.

Akomeza avuga ko usibye ubwo bufatanye, ngo n’abanyeshuri bumvishwa ko baje kwiga kandi bagomba gutsinda.

Agira ati “Ikindi noneho cy’iturufu kiriho ni uko ugomba kubanza wakundisha abana gutsinda. Ukamwumvisha ko aje aje kwiga, aje aje no gutsinda. Iyo umaze kumwemerera ko aje kwiga kandi agomba gutsinda icyo kiba ari intwaro ya mbere.”

Akomeza avuga ko gutsinda igihe kirekire bisaba ibintu byinshi. Kuri Groupe Scolaire Musasa ngo hari ubundi buryo bwinshi bubafasha gutsinda, burimo gushyira abana mu matsinda aho bigira hamwe basobanurirana.

G.S.Musasa iri ahantu hitegeye ikiyaga cya Ruhondo.

Abarimu bigisha kuri icyo kigo nabo ngo bagira ibyiciro babarizwamo: abigisha amasomo amwe kuva mu wa mbere kugeza mu wa gatandatu bajya hamwe kugira ngo nabo bajye bibukiranya, banasobanurirana ibyo bigisha.

Muri iki gihe ibizamini bya Leta bisigaye bikorwa mu rurimi rw’icyongereza. Manirafasha avuga ko kuba abana biga kuri Groupe Scolaire Musasa babanza kubatoza kuvuga ndetse no kumva icyongereza biri mu bibafasha gutsinda cyane.

Manirafasha Jean de la Paix umuyobozi wa G.S.Musasa avuga ko bafite gahunda yo kuba aba mbere mu gihugu.

Akomeza avuga ku mu mihigo yihaye ari uko mu myaka iri imbere abana baharangiza amashuri abanza cyangwa icyiciro rusange cy’amashuri yisumbuye, bose bazajya babona amabaruwa abemerera kujya mu bigo bya Leta bifite “internat”.

Yongeraho ko baharanira kuzaba aba mbere mu gihugu. Ngo ibyo bazabigeraho bakurikije gahunda bihaye ko buri mwaka bazajya bazamuka mu ntera mu mitsindishirize.

Kuri ubu Groupe Scolaire Musasa iza mu bigo bya mbere bitsindisha neza mu ntara y’amajyaruguru, aho mu mwaka wa 2011 cyabaye icya gatanu muri iyo ntara.

Norbert Niyizurugero