Minisitiri w’uburezi, Dr. Vincent Biruta, avuga ko kimwe mu byo iyi kaminuza yitezweho harimo kongera amasomo itanga, bityo umubare w’abanyeshuri b’abanyarwanda bajya kwiga hanze ukagabanuka, ahubwo n’abo hanze bakaza kwiga ino.

Yagize ati: “Turashaka ko ireme ry’uburezi ritera indi ntambwe, dutekereza ko n’izindi nyigisho zitaratangwa muri iyi kaminuza duhurize imbaraga hamwe nazo zibashe gutangwa, aho kugirango tunakomeze kohereza abanyeshuri benshi mu mahanga, ahubwo n’abo mu mahanga baze kwiga mu Rwanda. Dufite icyizere kuko na guverinoma y’u Rwanda irabishyigikiye”.

Minisitiri Biruta, avuga kandi ko gahunda yo guhuriza hamwe iyi kaminuza, yatekerejwe kugirango izabashe kwifashisha ubushobozi bucye buhari, ariko itange uburezi bufite ireme. Gusa ngo iri reme rigomba guhera mu mashuri yisumbuye.

Bamwe mu bayobozi bakuru ba kaminuza y’u Rwanda bateraniye mu mwiherero i Musanze

Pudence Rubingiza, wungirije icyegera cy’umuyobozi wa kaminuza y’u Rwanda,akaba ashinzwe imari, avuga ko ireme ry’uburezi ari kimwe mu byo bashyize imbere, kandi ngo nibashyira imbaraga hamwe bizatanga umusaruro.

Ati: “Ireme ry’uburezi turarishyira imbere. Uburyo twabigeraho ni uko tugiye kujya dusubiramo, tugasuzuma imyigishirize, dutekereza ko ireme ry’uburezi ritera imbere dushyize ingufu mu banyeshuri duhereye mu mashuri yisumbuye.

…abanyeshuri bagategurwa bavuga bati ngiye kujya muri kaminuza ariko ngomba kujyayo ari uko nujuje ibi n’ibi. Kaminuza igakorana n’amashuri yisumbuye, ikayaha ibyo dukeneye ko bagomba guteguramo abanyeshuri kugira bashobore kugera muri kaminuza, bityo kaminuza ikomereze ho”.

Ayahoze ari amashuri makuru na kaminuza agera kuri arindwi, niyo yahurijwe hamwe akora kaminuza y’u Rwanda. Iyi kaminuza ikaba yarashinzwe hagamijwe kugirango hakoreshwe bicye bihari, kugirango ihe igihugu abakozi bazobereye kandi babifitiye ubushobozi, ndetse no kugirango ifashe kugirango ireme ry’uburezi ritere indi ntambwe.

Jean Noel Mugabo