Nshimiyimana Celestin, umwe mu banyeshuri bigishwa ururimi rw’amarenga na mwarimu Uwimana, avuga ko uyu mwarimu nubwo atumva, ngo yifitemo impano yo kwigisha.

Abandi banyeshuri bigishwa na Uwimana, nabo bavuga ko nta muntu ukwiye gusuzugura umuntu wese abonye bitewe n’ikibazo cy’ubumuga afite, ngo kuko nawe aba ari umuntu kimwe n’abandi kandi ashoboye kimwe nabo.

Uwimana Blandy ngo ashimishwa n’uko ibyo yigisha abanyeshuri babifata vuba.

Uwimana, umukobwa w’imyaka 25 akaba na mwarimu w’ururimi rw’amarenga, akaba n’umukozi wa minisiteri y’imari n’igenamigambi (MINICOFIN), avuga ko yahuye n’ikibazo cy’indwara ya Mugiga afite imyaka itatu, bimuviramo ubumuga bwo kutumva.

Ibi ariko ntibyamubujije kwiyumvamo ko ashoboye gukora ibyo kagombye gukora n’ubundi, nubwo byamugoye cyane.

Uwimana yagiye gukora muri MINICOFIN arangije amasomo ajyanye n’imiyoborere, imicungire mu ishuri rikuru nderabarezi rya Kigali (KIE).

Aba banyeshuri bavuga ko kwigishwa n’umwarimu w’amarenga ntaho bitandukaniye n’abasanzwe.

Uyu mukobwa avuga ko kwiga kwe byamugoye cyane kuko yiganaga n’abandi bana bumva gusobanurirwa bikamugora ndetse n’abarimu nabo bikaba ibibazo.

Ikindi Uwimana agarukaho, ngo ni uko abantu bose bari bakwiye kwigishwa ururimi rw’amarenga kugirango bashobore gufasha abafite ubumuga bwo kutumva.

Uwimana yatangiye kwigishwa ururimi rw’amarenga mu mwaka wa 2007, avuga ko ashimishwa cyane n’ukuntu akandwa n’abanyeshuri yigisha kuko bimuha imbaraga n’icyizere cy’uko abatumva nabo bazagera aho bakiyumva muri sosiyete nyarwanda, kuko abenshi bagihura n’ingorane kubera ikibazo cy’ururimi.

Eric Muvara