Intore 47 zishoje urugerero mu murenge wa Mukindo zitangaza ko zinezezwa no kubona nazo zigira uruhare mu iterambere ry’igihugu binyuze mu bikorwa bitandukanye.

Nk’imfura z’urugerero ariko kandi zitangaza ko zagiye zihura n’imbogamizi zitandukanye zagendaga zizibuza kunoza neza ibikorwa byabaga biteganyijwe, arinayo mpamvu zifuza ko hazabaho impinduka mu gihe kiri imbere, mu itegurwa ryarwo bikajya bitekerezwaho.

Sibomana Samuel uhagarariye intore zo ku rugerero mu murenge wa Mukindo ati: “Mu bikorwa twagiye dukora haba mu bikorwa by’amaboko twagiraga rimwe na rimwe ikibazo cy’ibikoresho ahandi tukabura uburyo bwo gutumanaho kuko tutabaga dufite amafaranga yo guhamagarana kuri telefoni, mbona ibi byose ubutaha byazajya biteketezwaho mbere”.

Habiyaremye Jean de Dieu umutahira w’intore z’imbanzabigwi za Gisagara arongera gushima cyane ibikorwa by’izi ntore byari bishingiye ku nkingi enye za Guverinoma, akizeza kandi intore z’igihe kiri imbere ko nta mbogamizi zizahura nayo kuko akarere kiyemeje kuzazifasha kubona ibyo zizaba zikeneye bitabonetse ubu.

Ati «Izi ntore zakoze akazi katoroshye kandi keza rwose. Imbogamizi ntizari kubura kuko buri gihe mu ntangiriro ntibyoroha ariko twizeye ko bitazongera kuko akarere katwijeje ubufasha tuzajya dukenera».

Umutahira w’intore z’imbanzabiwi za Gisagara kandi aranasaba izi ntore kuzakomeza kuba intore z’indashyikirwa, zikarangwa n’ubutore bwazo aho zizajya hose.

Izi ntore 47 kandi mu gusoza urugerero zahawe certificat zigaragaza ko zakoze urugerero, zikaba zishoje ikiciro cya 2 cy’urugerero cyamaze amaze agera kuri arindwi.

Clarisse Umuhire