Yagize ati “Abize mbere bahawe inguzanyo, basinye amasezerano yo kuzazishyura, bakaba bataratangira kwishyura kandi bamaze igihe bakora, baba bakorera Leta, ibigo byigenga cyangwa bikorera ubwabo, inguzanyo bahawe bagomba kuyishyura kugira ngo n’abandi Banyarwanda babone kuyiheraho na bo biga”.

Yakomeje agira ati “Turabasaba kuba abaturage beza. Umuturage mwiza ntiyambura uwamugurije. Ntabwo umuturage mwiza yakwambura Leta. Nibibwirize rero bishyure vuba na bwangu”.

Minisitiri w’intebe yasabye abigiye ku nguzanyo ya Leta kwishyura ngo n’abandi babone uko bagurizwa.

Yibukije abize bahawe inguzanyo ya Buruse ko kwishyura bitaruhije kuko umuntu asabwa gutanga make makeya, yongera ho ko mu gihe batishyuye hazafatwa izindi ngamba zo kwitabaza amategeko.

«Nibishyure rero kuko ari ngombwa, bitabaye ibyo, twazitabaza amategeko n’ingufu za Leta kandi muzi ko zihora ari nyinshi cyane,» Minisitiri Murekezi.

Abasaga ibihumbi bitanu nibo bahawe inguzanyo yo kwiga uyu mwaka

Leta y’u Rwanda ikomeje kunganira abanyeshuri biga mu mashuri makuru na za kaminuza. Muri uyu mwaka wa 2014-2015, abemerewe buruse ni abanyeshuri 5841 batoranyijwe hashingiwe ku bintu bine aribyo ; ingengo y’imari, amanota y’umunyeshuri, amasomo atanga amahirwe menshi ku isoko ry’umurimo kurusha ayandi n’ubushobozi bw’umunyeshuri n’ababyeyi be, nk’uko Minisitiri w’intebe yakomeje abisobanura.

Minisitiri Murekezi yanavuze ko n’ubwo Leta idashobora kwishyurira abifuza kwiga bose, ngo iri kunoza uburyo abashaka kwiga bakwiyakira inguzanyo zo kwiga ubwabo binyuze mu mabanki Leta ikabigiramo uruhare kugira ngo bikorwe neza, banki y’u Rwanda itsura amajyambere (BRD) ikaba ariyo yahawe inshingano zo gutunganya icyo kibazo.

Marie Claire Joyeuse