Iri shuri ryatangijwe na rwiyemezamirimo Nsegimana Ahmed mu mwaka wa 2012 ubu rifite abanyeshuri baturuka mu bihugu binyuranye birimo Rwanda, Tanzaniya, Uganda, Burundi, Kenya, Congo, Oman n’ibindi.

Mu bifasha abana kwiga neza hari n’imfashanyigisho zo ku nkuta z’amashuri.

Kugeza ubu iri shuri ryigwamo n’Abanyarwanda 290, Abanyatanzaniya 21, Abanyekongo babiri, Abarundi batanu, Umunya Uganda umwe, umunyakenya umwe, Umunya Oman umwe, n’Umunya Cote d’Ivoire umwe.

Umuyobozi w’iri shuri Akagera International School, Twahirwa yemeza ko uburezi batanga bwerekeza ku rwego rwagutse bakarenga imbibi z’u Rwanda kuburyo umwana uvuye muri iri shuri azajya ajya guhatana n’abandi hanze y’u Rwanda.

Abo bana babyina Ikinyarwanda harimo n’abaturutse mu bindi bihugu.

Yagize ati “iri shuri rifite intumbero yo kuba mpuzamahanga kandi twarabitangiye abanyamahanga barigana ni benshi bigana n’abana b’abanyarwanda kandi ntibigire icyo bihungabanya ku muco kuko n’ururimi rw’ikinyarwanda turarwigisha kandi abanyamahanga bakarwishimira bakanashishikazwa no kumenya kuruvuga”.

Ku bijyanye no kurengera umuco nyarwanda ikigo gifite abarimu bashinzwe imyitwarire (discipline team) hakaba n’ababyeyi bakurikirana abana kugeza aho barara. Ngo ibyo bibafasha kubungabunga imibereho y’abana umunsi ku munsi.

Nkuko izina ry’ishuri ribivuga ngo ritanga ubumenyi mu rwego mpuzamahanga.

Abanyeshuri bo muri icyo kigo baganiriye na Kigali Today bavuga ko babayeho neza kuko ngo ibikenewe byose birahari byaba ubumenyi, umuco, uburere n’ibindi.

Focas Cryispin Kamugisha umunyeshuri uturuka muri Tanzaniya avuga ko yahisemo kuza muri Akagera International School ku mpamvu y’uko yaganiriye n’abanyeshuri bahiga yumva nawe ashaka kuhiga asaba ababyeyi be kuhamuzana.

Yagize ati “nkunda uburyo bigisha, uburere duhabwa n’ibikorwa bihakorerwa cyane cyane ibijyanye na siporo (football, basketball, rugby, dancing n’izindi) nishimiye cyane iki kigo.”

Abarezi b’ishuri Akagera International School biteguye kurigeza kuri byinshi.

Ines Iraguha uturuka mu karere ka Kicukiro aravuga ko yaje mu ishuri Akagera International School abikunze.

Yagize ati “navuye i Kigali nza muri iki kigo mbikunze kuko ushaka inka aryama nkazo, batanga uburere bwiza bigisha umuco, nk’ubu n’amenye kubyina bya Kinyarwanda ngeze muri iki kigo, tubayeho neza hari disipurini, bigisha indimi zose, twiga n’uko tugomba kwifata mu kwirinda ibishuko, ndishimye cyane ndasaba n’abandi bana kuza tukigana”.

Mu bifasha abana kwiga neza hari n’imfashanyigisho zo ku nkuta z’amashuri.

Mu bindi biranga icyo kigo ni uko abanyeshuri bahabwa amahirwe angana mu bijyanye n’imyemerere yaba umukirisitu, yaba umuyisiramu mu madini yose barahiga kandi bose bagasenga mu myemerere yabo bakanakundana.

Abanyeshuri baturuka hanze nabo bishimiye umuco w’u Rwanda kuko abenshi bagaragara mu itorero ndangamuco w’ikigo kandi bakabikora babikunze.

Aho batunganyiriza amafunguro harangwa n’isuku.

Iki kigo kigizwe n’ibyiciro bibiri hari icyiciro cy’amashuri abanza n’icyiciro cy’amashuri yisumbuye .Ubu kifite abana 322 mu byiciro byombi, abarimu 17 n’ibyumba 11 by’amashuri.

Nubwo bambaye nk’abayisiramu bose siho basengera.

Mbere yuko abana bajya mu biruhuko babanza guhabwa impanuro.

Servilien Mutuyimana