Iri genzura ryitwa CPIA ritanga amanota rishingiye ku byiciro bine aribyo imicungire y’ubukungu, kugira gahunda za Leta zinoze, guteza imbere ibyiciro by’abaturage basigaye inyuma kurusha abandi, ndetse n’imicungire inoze y’inzego. Amanota mabi cyane ni 1 naho ayo hejuru cyane ni 6.

U Rwanda ruza ku mwanya wa gatatu nyuma ya Cap Vert na Ghana, rwabonye amanota meza mu guteza imbere icyiciro cy’abaturage basigaye inyuma kurusha abandi mu mibereyo; nk’uko bigaragara muri raporo ya banki y’isi yashyizwe ahagaragara tariki 28/06/2012.

Omowunmi Ladipo uyoboye ishami rya banki y’isi mu Rwanda yavuze ko u Rwanda rukomeje kwitwara neza mu kuzamura ibyiciro by’abaturage basigaye inyuma, aho 12% by’abaturage batari bishoboye bavuye munsi y’umurongo w’ubukene.

Gahunda yo kuzamura ibyiciro byasigaye inyuma mu Rwanda yonyine yahawe amanota ane (4.0), ariko bitewe n’ikorwa ry’impuzandengo, yaje kwicirwa na gahunda y’imicungire y’inzego, yahawe amanota 3.6.

Ibihugu bigize umuryango w’Afurika y’Uburasirazuba (EAC) nibyo biza ku mwanya wa mbere muri iki gipimo cya CPIA; nk’uko Shanta Davarajan uhagarariye Bank y’isi muri Afurika yatangarije Kigali Today.

Yagize ati “U Rwanda by’umwihariko rukomeje kwitwara neza mu kuzamura ubukungu bushingiye ku kongera umusaruro w’ibyoherezwa hanze, ndetse no kuzamura umusaruro w’ubuhinzi”.

Afurika yo munsi y’ubutayu bwa Sahara irashimwa na banki y’isi kuba ikomeje kugaragaza ubwiyongere bw’ubungu, nubwo muri iki gihe isi yugarijwe n’ihungabana ry’ubukungu rikomeye.

Simon Kamuzinzi