Aya masezerano yashyizweho umukono kuri uyu wa Kane tariki 5/12/2013, ateganya ko igice kinini aricyo kizajya mu bikorwa remezo byo kuzamura imyuga naho asigaye agashyirwa mu bikorwa by’iterambere no kwegereza ubuyobozi abaturage.

Amb. Claver Gatete, Minsitiri w’Imari n’Igenamigambi, yatangaje ko kwegereza ubuyobozi abaturage bizagendana no kubafasha kwibeshaho mu mishinga izaterwa inkunga n’aya mafaranga.

Yagize ati “Icyo tuvuga ni bwa buryo bwo kubegereza ubuyobozi ni no kubafasha mu iterambere. Kubafasha mu buryo bw’iterambere hari ibikorwa byinshi bijyanye n’iterambere muri cya kigega dushyiramo amafaranga buri kwezi kugira ngo abe yafasha iterambere ry’icyaro.

Minisitiri Gatete na Ambasaderi w’u Budage mu Rwanda mu gikorwa cyo gusinya amasezerano y’inkunga.

Muri iryo terambere akensi abantu bari mu cyaro bari mu buhinzi. Akenshi iyo babonye umusaruro wabo bagomba kuwujyana mu masoko. Ubwo rero hakaba hakenewe imihanda, amashanyarazi kugira ngo bashobore kongera agaciro ku byo bakora.”

Ku ruhande rw’u Budage ngo uru ni urugero rw’ubushake iki gihugu gifite bwo gushyigikira u Rwanda kubera ukuntu rukomeje kuba intangarugero mu kwiteza imbere, nk’uko ambasaderi w’u Budage mu Rwanda yabitangaje.

Amafaranga azashyirwa mu mishinga ni azajya mu bigo by’imyuga n’amashuri yigisha imyuga, cyane cyane hashyirwaho ibikorwa remezo no kuvugurura ibyariho. Mu iterambere ry’icyaro ho hazubakwa imihanda n’amateme, hashyirweho umuriro n’amasoko agezweho.

Emmanuel N. Hitimana