Minisitiri w’Intebe yateruye agira ati “Muri Huye hari impinduka zigaragara. Ndashimira abikorera uruhare bagenda bagira mu gutuma umujyi wabo utera imbere. Ariko iyo umuntu ashaka gutera imbere ntiyishima ibyiza gusa, areba n’ibitagenda. I Huye nta banki mugira, kuko banki ikorera mu karuri nta banki irimo”.

Muri rusange, amabanki ari i Huye akorera ahantu hatoya naho h’ahakodeshanyo. Urugero nka BCR ikorera ahantu hatoya, ku buryo mu gihe abanyeshuri ba Kaminuza bakererewe kuriha baza gutanga amafaranga y’ishuri ari benshi, usanga batonze umurongo muremure imbere y’iyi banki, badafite aho bicara cyangwa ngo banugame izuba.

Minisitiri w’intebe rero ati “banki zivugurure amazu zari zisanzwe zikoreramo atajyanye n’igihe tugezemo, cyangwa zumvikane n’abikorera bazubakire, hanyuma bajye bakodesha”.

Ikibazo cy’inyubako zo gukoreramo zijyanye n’igihe tugezemo, amabanki akorera i Huye agisangiye n’amasosiyete y’ubwishingizi na yo ahakorera. Na yo rero yasabwe kubaka inzu zigezweho mu bibanza yari asanzwe akoreramo cyangwa akabiha abashoramari bazajya bakodesha.

Minisitiri w’Intebe kandi ati “nta nganda ziba i Huye. Uruganda rutunganya ibishyimbo n’urw’amazi ya Huye ntizihagije. Umujyi watera imbere ute utagira inganda? Mwabuze abubaka inganda zikora inzoga ipfundikiye neza bakareka kunywa iz’inkorano banywa zikabica?”.

Haherewe ku kuba i Huye basigaye beza umuceri nyamara nta ruganda ruwutunganya bafite, umuyobozi w’Akarere n’uw’Intara basabwe gukora ku buryo hajyaho bene uru ruganda.

Icyakora habonetse n’uwikorera ufite gahunda yo gushyiraho uruganda rutunganya amazi yo kunywa, agakora imitobe ifunguye n’idafunguye ndetse akanakora konfitire. Hanabonetse abafite umushinga wo gukora inzoga y’ikigage ipfundikiye.

I Huye kandi ngo nta mahoteri ahaba. Minisitiri w’Intebe ati “hano i Huye nta hoteli y’inyenyeri enye, eshanu, esheshatu, … zihari.

Mugarukira ku z’inyenyeri ebyiri. Mukore ku buryo mu mwaka wa 2016 muzaba mufite byibura hoteli enye z’inyenyeri enye. Naho ubundi, n’ubwo muzaba mufite sitade ishobora kwakira imikino ya CHAN, nimuzaba mudafite izo hoteli iyo mikino ntizahabera.”

Abanyehuye rero ngo bafite umurimo ukomeye wo kuvugurura uko umujyi wabo wubatse, kuko umuvuduko bakoreraho ubungubu ari mutoya. Batarebye neza, ngo imijyi ifite umuvuduko nka Rubavu, Rusizi, Muhanga, na Musanze yazabacaho.

Abanyehuye na bo bagaragaje ko kuba ibigo byari bisanzwe bihakorera bigenda byimukira i Kigali biri mu bituma uyu mujyi wari usanzwe ari uwa kabiri mu gihugu nyuma ya Kigali ugenda usa n’usubira inyuma.

Aha Minisitiri w’Intebe yabemereye ko nka Guverinoma bazashaka uko bakemura iki kibazo.

Marie Claire Joyeuse