Uyu mugabo uvuga ko akunda kwiga cyane, ku buryo yumva yanakomeza igihe ubushobozi bwaboneka, avuga ko mu myaka ine amaze yiga, itatu yayimaze akora akazi ko gutwara moto mu mujyi wa Musanze, yabona 17h00 zegereje agaparika moto akajya kwiga.

Ibi kandi ngo ntibyamubujije gutsinda cyane. Ati: “n’ubwo nari narize tukiga mu gifaransa, aho twigaga icyongereza gicye, ntabwo byambujije gutsinda neza. Nshobora kukubwira ko ndangije mfite amanota 15.79 ndi uwa kabiri mu gashami nizemo”.

Uyu mugabo avuga ko kwiga abikora kuko abikunze cyane, ndetse akumva yanafasha n’abandi batabishoboye kugirango bajye kwiga. Ati: “n’iyo mpuye n’umwana utari kwiga kubera ubushobozi nkora uko nshoboye ngo ajyeyo”.

Pierre Claver avuga ko kwitwarira moto byatumye abasha kwirihira ishuri.

Ati: “Kugeza ubu nta mikoro mfite yo kuba nakomeza, ariko ndamutse nyabonye nshobora kuba nakomeza, kuko ubu nta kazi mfite gashobora kumfasha gukemura ibikenewe nko gutunga urugo kurihira abana maze nkasagura ayo kwiga ibyiciro byisumbuye”.

Uyu mugabo avuga ko ibanga yakoresheje kugirango akazi kabashe kumugeza ku rwego agezeho, ari uko yitwaye neza, agakurikiza amategeko y’umuhanda uko ategetswe, ndetse akanafata neza abamugana.

Ati: “Imana yaramfashije abantu bangirira ikizere ku buryo nabonaga abagenzi mu buryo buciriritse. Ayo mafaranga rero nakuraga muri ako kazi niyo yamfashaga ku bijyanye n’amafaranga y’ishuri yaba make nashobora kuba nagurisha imitungo nsanzwe mfite”.

Uyu mugabo avuga ko kwiga bitagira iherezo, kuko umuntu buri gihe aba akeneye kumenya ibintu bishya.

Ati: “nk’ibintu byo gupima ubutaka ‘land survey’ ni ibintu nashakaga gukurikira, ni uko nasanze naramaze gukurikira rural development economics, ariko ni ikintu umuntu agenda asobanukirwa ukabona ibintu bishya kandi bifatika,ku buryo numva nabyo nifuza kubyizabyiga”.

Jean Noel Mugabo