Mu gikorwa bakoze mu mpera z’iki cyumweru cyarangiye tariki 16/09/2012 abaturage bo mu murenge wa Cyanzarwe bakusanyije miliyoni eshatu n’ibihumbi 100; kandi biyemeza kuzakomeza gushyira mu kigega uko bifite kugeza bageze ku ntego bihaye.

Abaturage bagiye batanga uko bifite bagamije kwihesha agaciro, cyane ko bavuga ko ntawabakuye mu ngo zabo ahubwo bifuza guha igihugu cyabo amaboko nk’uko kibaha umutekano n’iterambere kandi bakishimira kwihesha agaciro.

Abaturage bagiye gutanga umusanzu wabo bavuga ko banze agasuzuguro k’amahanga kandi ko bashaka kubeshaho igihugu cyabo kidatunzwe no gusabiriza ahubwo ku bw’amaboko y’abagituye.

Benshi mu baturage batanga umusanzu wabo bavuga ko bashimira igihugu kuba cyarabahaye umutekano, ndetse kigashobora kubavana mu bucyene bakagezwaho gahunda ya Girinka n’uburezi bw’ibanze ku buryo ibyari inzozi byabaye ukuri.

Bakavuga ko nibaramuka babigizemo uruhare hazakorwa byinshi byiza bakomora ku miyoborere myiza, u Rwanda rugakomeza kuba icya mbere mu kwiyubaka.

Mu murenge wa Cyanzarwe byatunguranye kuko uretse abakuru batanze umusanzu n’abana bagaragaje uruhare rwabo aho umwana muto yatanze inkwavu ze ebyiri kugira ngo u Rwanda rushobore kugera ku cyerekezo rwihaye.

Sylidio Sebuharara