Ibi byavugiwe mu nama yahuje abayobozi mu nzego z’ibanze, iz’umutekano n’abakozi bashinzwe ibijyanye n’imisoro mu karere ka Bugesera, tariki 23/05/2012, baganira ku ngamba zafatwa ku bijyanye no kwinjiza imisoro n’amahoro.

Zimwe muri izo ngamba ni ukunoza imikoranire hagati y’inzego n’abaturage mu kurwanya magendu, gutunganya amasoko no kunoza imisoreshereze; nk’uko bitangazwa na Mpambara Benoit umuyobozi w’ishami ry’imari mu karere ka Bugesera.

Birasaba ingamba zitajenjetse nko gucungira hafi iyinjizwa rya magendu yambukira ku mipaka, na yo ubwayo ikiri inzitizi ku ruhande rw’u Rwanda n’u Burundi, kuzitira amasoko y’amatungo kuko akenshi beneyo bataha badasoze no kuzamura umubare w’abacuruzi bakajya muri TVA kuko ari bwo basora amafaranga yisumbuyeho; nk’uko umuyobozi w’ishami ry’imari mu karere ka Bugesera yakomeje abisobanura.

Nk’uko byagaragajwe n’uhagarariye ikigo cy’igihugu gishinzwe kwinjiza imisoro n’amahoro mu ntara y’i Burasirazuba, Karasira Erneste, ngo byagaragaye ko akenshi inzoga nka Amstel arizo zikunze kwinjira mu buryo bwa magendu zikaba zikubye inshuro 5 izisora.

Muyengeza Jean de Dieu, umunyamabanga nshingwabikorwa w’umurenge wa Kamabuye uhana imbibe n’u Burundi ukaba ushobora kuba wakwambukiramo ibicuruzwa bidasoze yavuze ko nyuma y’iyi nama asanze hakwiye ubufatanye bw’inzego.

Egide Kayiranga