Ibi Minisitiri w’Intebe yabitangarije mu karere ka Rutsiro kuwa kabiri taliki 15/05/2012, nyuma yo gusura urwo rugomero.

Uruzinduko rwa Minisitiri w’Intebe mu karere ka Rutsiro rwari mu rwego rwo kureba aho imirimo yo kubaka urugomero rwa Gashashi rugeze, nyuma y’imyaka igera kuri ine ruhagaze, kubera ko rwiyemezamirimo wari waratsindiye isoko ryo kurwubaka ukomoka muri Sri Lanka atubahirije ibyari bikubiye mu masezerano.

Nyuma yo gusura uru rugomero, Minisitiri w’Intebe yabajije impamvu imirimo yo kurwubaka yadindiye, agereranyije n’urugomero rwa Nyabahanga yari avuye gusura mu karere ka Karongi. Yasubijwe ko impamvu nyamukuru yatumye imirimo itihuta, aruko ngo uburyo uwatangiye kubaka uru rugomero, bugoranye kuburyo abari kurwubaka ubu bibagora, gusa ngo bari gukora ibishoboka byose kugira ngo imirimo yo kurwubaka yihutishwe.

Dixiang Xiong, uhagarariye sosiyete y’Abashinwa yubaka rugomero rwa Gashashi avuga ko kurangiza kubaka urwo rugomero bishobora kuzafata amezi agera ku icyenda kubera ko gusenya iby’uwambere yubatse nabyo biri kubagora.

Ku kibazo cy’amazi make ashobora kuba adahagije kugirango, kilowati 200 ziteganyijwe ziboneke, sosiyete MST ikora urwo rugomero yasubijeko icyo kibazo bagikemuye ku buryo nta mpungenge kizatera.

Umushinga wo gutanga amashanyarazi ku baturage ni umushinga ufite ibice bitandatu ukaba uri gukorerwa mu turere twa Gakenke, Rutsiro, Nyaruguru, Karongi, Burera na Nyamasheke.

Urugomero rwa Gashashi ruri kubakwa ku mugezi wa Gashashi, ugabanya imirenge ya Kivumu na Kigeyo, rukazatwara amafaranga agera kuri miliyoni imwe n’ibihumbi 260 y’amadorari y’Amerika.

Védaste Nkikabahizi