Mu kiganiro yagiranye n’abanyamakuru kuri uyu wa gatatu tariki 19/9/2012, Ministiri John Rwangombwa yatangaje ko abaye ahagaritse gukata umushahara w’abarimu w’uku kwezi kwa Nzeri, kuko ngo bawukuriwe ku mishahara yabo batabyiyemereye.

Si abarimu gusa batangishijwe umusanzu batabishaka, kuko ngo mu midugudu imwe n’imwe no mu bigo cyane cyane iby’amashuri, abayobozi ari bo bifuje amafaranga azatangwa na buri muntu; nk’uko Ministiri Rwangombwa asobanura ko yumvise abaturage binuba.

Yagize ati: “Nubwo ari imihigo, turakangurira abantu kwamagana aka gahato, kuko iki ni igikorwa kizahoraho, umuntu agomba kwemera bimuvuye ku mutima, ni cyo dushaka”.

Abarimu bazongera guhabwa impapuro zo kuzuzaho ayo buri wese yishakiye gutanga ndetse anayasinyire, nk’uko ariko bigomba kugenda ku bakozi bose.
Abaturage muri rusange nabo basabwe kuzatanga bakurikije uko ubushobozi n’ubushake bwabo bingana.

Kugeza ubu ikigega AgDF kimaze kwegeranyirizwamo miliyari 18

Ministiri muri MINECOFIN yemeje ko abaturage bafite umutima utanga, kuko nyuma y’ukwezi kumwe, ikigega AgDF kimaze gushyirwamo umusanzu ukabakaba miliyari 18, kandi ko hari benshi bakomeje kuvuga ko bazayatanga.

Ku bibaza aho amafaranga ibigo bya Leta birimo gutanga ava, Ministiri Rwangombwa asobanura ko nta kigo cya Leta gitanga ayo kigenerwa mu ngengo y’imari, ahubwo ari amafaranga ava ku mifuka y’abakozi.

Umusanzu w’ikigega AgDF uzakoreshwa mu byiciro bibiri: igice kimwe kizagenerwa ibikorwa mu mpera z’uyu mwaka, ikindi kikazazigamwa, kugira ngo kizajye kigoboka igihugu mu gihe haba habayeho ibibazo bidasanzwe.

Simon Kamuzinzi