Uku kwiyongera k’ubukungu bw’u Rwanda byatumye umutungo wa buri Munyarwanda n’imibereho myiza muri rusange byiyongera; nk’uko bigaragara mu kigereranyo cyashyizwe ahagaragara kuri uyu wa kane tariki 22/03/2012 n’ikigo cy’igihugu cy’ibarurishamibare.

Ukwiyongera k’ubukungu bw’u Rwanda bwatumye umutungo winjizwa na buri Munyarwanda wiyongera ugera ku madorali y’Amerika 595 ku mwaka ugereranyije na 540 yinjizwaga mu mwaka wabanje.

Mu cyegeranyo cyashyizwe ahagaragara n’ikigo cy’igihugu cy’ibarurishamibare mu mwaka wa 2011, 46% by’umutungo waturutse mu nzego za serivisi nk’amabanki n’itumanaho. 32% by’umutungo byaturutse ku buhinzi, naho 16% byinjizwa n’inzego z’inganda n’ubukorikori, usigaye 6% waturutse mu ikusanwa n’ihererekanya.

Ibi bigaragaza ko inzego zitanga serivisi mu Rwanda nk’itumanaho , amabanki, ubwikorezi bw’abantu n’ibintu(transport) ndetse n’ibindi biza ku isonga mu gutanga umusanzu w’ubukungu bw’igihugu.

Urwego rw’inganda rwazamutse ku cyigereranyo cya 18% mu mwaka wa 2011, naho ubucukuzi bw’amabuye y’agaciro bwiyongera ku kigereranyo cya 50% ugereranyije n’igabanyuka ryagaragaye mu mwaka wa 2010.

Mu mwaka wa 2000 gusa ubukungu bw’uRwanda bwinjizwa n’abanyagihugu (GDP) bwari buhagaze ku cyigereranyo cya tiriyoni 1.066. Ibi bishatse kuvuga ko ugereranyije ubukungu bw’u Rwanda imyaka 10 ishize n’uyu munsi, bigaragara ko bwiyongereye ku kigero cya 400%.

Bright Turatsinze