Iki kigega cyuzuye ku nkunga yatanzwe n’Ambasade y’Ububiligi n’umushinga IABU wunganira abahinzi n’aborozi mu murenge wa Busasamana cyatwaye amafaranga miliyoni 123.

Abaturage bavuga ko kizabafasha guhunika umusaruro wabo aho kweza bawujyana ku isoko kugira ngo bitangirika rimwe na rimwe bakanahendwa. Ngo icyo bari basanganywe ni gito ndetse ntikibashe kubabikira imbundo bakoresha mu gihe cy’ihinga.

Abaturage bo mu murenge wa Busasamana bashima ko IABU yabafashije kumenya guhinga byongera umusaruro, aho kuri hegitare imwe bashobora kweza toni 23 kubera amasomo y’ubuhinzi bigira mu murima, mu gihe mbere bakuragamo umusaruro utarenze toni eshatu.
Abaturage 6000 bamaze kwigishwa ubuhinzi n’ubworozi bwa kijyambere.

Buntu Ezechiel umuyobozi w’akarere ka Rubavu ushinzwe ubukungu n’iterambere avuga ko ibikorwa bifasha abaturage kongera umusaruro bituma barushaho gutera imbere no kugira imibereho myiza, ariko ko n’uruhare rwabo rucyenewe kugaragazwa bubahiriza gahunda za Leta nko kuboneza urubyaro kugira babone umwanya wo gukora no kugabanya imirimo bakora.

Ikindi abaturage basabwa kwibandaho ni ukwitabira gahunda y’ubwisungane mu kwivuza kuko ibafasha kugira ubuzima bwiza batazahajwe n’indwara.

Katrien Meersman ushinzwe iterambere n’ubufatanye muri Ambasade y’Ababiligi avuga ko abaturage batuye mu gace k’ibirunga bafite amahirwe yo kubona umusaruro kandi bagomba kongera mu kwihaza, kongera ubukungu no guhaza igihugu cyabo, akavuga ko ibikorwa byashyikirijwe bagomba kubibyaza umusaruro kugira bashobore kugira ijo hazaza.

Sylidio Sebuharara