Uyu musore ukorera uyu mwuga muri santere y’ubucuruzi ya Tare mu murenge wa Tare avuga ko atabashije gukomeza amashuri kubera ikibazo cy’ubushobozi kuko nta mubyeyi n’umwe agira.

Agira ati: “Nge ndi imfubyi nta mubyeyi n’umwe ngira. Narakoze nza mu cyiciro cya kabiri cyo kujya muri nayini (uburezi bw’ibanze bw’imyaka 9) noneho rero mbura amafaranga yo kugura imyenda no kugura amakayi, ubundi mbivamo mpita nza gukora amagare nkuramo igishoro cyo kugura irangi.”

Uwintore avuga ko gusiga irangi ku igare rimwe bamwishyura amafaranga y’u Rwanda ibihumbi bibiri, akaba yungutseho nk’amafaranga 500. Ngo iyo akazi kamuhiriye ku kwezi ashobora kuba afite nk’inyungu y’ibihumbi 15 kuberako uko ayakorera ari nako aba agomba kwikemurira ibibazo nko kubona amafunguro n’ibindi.

Mu gihe kingana n’imyaka ibiri amaze muri aka kazi, ngo ubu amaze kwigurira ihene ebyiri n’inkoko ebyiri, anafite amafaranga ibihumbi 30 yizigamiye kuri konti.

Uwintore avuga ko afite umugambi wo gukorera amafaranga yamara kuyagwiza akajya kwiyungura ubwenge mu ishuri ryigisha gukanika amamodoka.

Uyu musore kandi atanga ubutumwa ku rubyiruko bagenzi be ko badakwiye kurera amaboko, ahubwo ko bakwiye gushaka icyo bakora cyabinjiririza amafaranga.

Emmanuel Nshimiyimana