Ibi Minisitiri w’Intebe yabitangaje kuri uyu wa kane tariki 31/5/2012 ubwo yasuraga aho uru rugomero ruri kubakwa ku mugezi wa Rukarara mu karere ka Nyamagabe.

Nyuma yo kwirebera no gusobanurirwa aho ibi bikorwa bigeze, Minisitiri w’Intebe yasabye abayobozi b’Intara y’Amajyepfo ndetse n’ab’akarere ka Nyamagabe gushyiramo imbaraga bakihutisha uyu mushinga benshi bavuga ko wadindiye.

Minisitiri w’Intebe yagize ati “Mushyiremo imbaraga zishoboka, Guverinoma yacu, igihugu cyacu nta kintu cyatunanira twagishyizemo imbaraga rwose!Ariko amashanyarazi yo arakenewe”.

Umushinga wa Rukarara ya kabiri ni umwe mu mishinga igera kuri itatu yo kubaka ingomero kuri uyu mugezi wa Rukarara. Mu gihe Rukarara ya mbere yarangiye, umushinga wa Rukarara ya kabiri wo nturarangira wagombaga kuba wararangiye mu 2008.

Minisitiri w’Intebe ari gusobanurirwa ibikorwa by’umushinga wa Rukarara ya kabiri.

Kudindira k’uyu mushinga bishinjwa ba rwiyemezamirimo bagombaga kuwushyira mu bikorwa.Abatungwa agatoki ni komanyi yitwa Beijing Forever Technology Development Co. Ltd yari yarawutangiye ikaza kuwamburwa nyuma mu mwaka wa 2009 aho wahise uhabwa isosiyete yo muri Canada yitwa AECOM.

Uretse kuba uyu mushinga waradindiye, umaze gutwara amafaranga arenga ayari yarateganyijwe kuko bivugwa ko uzatwara amafaranga agera kuri miliyoni 26 z’amadolari y’Amerika mu gihe wagombaga gutwara miliyoni 11 z’amadolari.

Biteganyijwe ko urugomero rwa Rukarara ya kabiri ruzarangira gukorwa mu Ugushyingo uyu mwaka.

Umushinga wa Rukarara ya kabiri uri gushyirwa mu bikorwa ku bufatanye bwa Leta y’u Rwanda,Umuryango w’ubumwe bw’Uburayi hamwe n’igihugu cy’Ububiligi ukaba uteganyijwe kurangira tariki 30/11/2012.

Jacques Furaha