Iki gikorwa cyo gusinyana umuhigo hagati y’ubuyobozi n’abikorera kibaye ubwa mbere, cyabaye kuwa Kane tariki 15/08/2013. Abo baturage biganjemo abacuruzi bahamya ko bagikesha imikoranire myiza bafitanye mu bikorwa byabo bya buri munsi.

Abikorera mu murenge wa Kansi basinyanye umuhigo n’ubuyobozi bw’umurenge.

Mu gihe uyu murenge ugaragaza ko wesheje umuhigo ku kigereranyo cya 107% muri uyu mwaka w’umuhigo wa 2012/2013, abikorera bagize uruhare muri byinshi byakozwe, nk’uko byemejwe na Déon Kamugisha, uhagarariye urugaga rw’abikorera muri Kansi.

Yatangaje ko bakoze ibikorwa bifite agaciro ka miliyoni zirenga 23 z’amafaranga y’u Rwanda, birimo gufasha abatishoboye babaha amatungo no kugira uruhare mu kwiyubakira amashuri abana babo bigiramo.

Bamwe mu bacuruzi nabo bishimira gusinyana imihigo na Leta no gukorana nayo kuko hari byinshi bazungukiramo.

Yagize ati: “Ni ubwa mbere twari dutangiye gukorera hamwe nk’abikorera ku giti cyacu, ariko nk’abantu twari tukivuka twashoboye kugera kuri byinshi kandi bifite akamaro.”

Bimwe mu bigize uyu muhigo wasinywe, harimo ko aba bikorera bagiye gushinga koperative yenga inzoga zifunze, kubaka ifuru ritunganya imigati n’amandazi no kubaka byibura inzu imwe ijyanye n’igihe muri buri kagari mu tugize umurenge wa Kansi.

Kwiyemeza gusinyana imihigo n’umurenge wabo, babikesha kuba bariyemeje kwishyira hamwe. Ngo iki gikorwa kandi cyabafashije guhindura imyumvire, nk’uko Biziyaremye Jean Baptiste, watangiriye ubucuruzi bwe ku mafaranga macye cyane ariko ubu afite aho ageze yabivuze.

Umunyamabanga nshingingwabikorwa w’umurenge wa Kansi, Jérôme Rutaburingoga, yavuze ko gusinyana imihigo n’abikorera ari intambwe ishimishije, ngo kuko hari byinshi bagiye kunganira uru rwego rw’ubuyobozi bwite bwa leta.

Ati: “Gukorana n’abantu bafite umuhigo biroroha kuko ubwabo barikoresha, ikindi kandi bazadufasha kumvisha abaturage ibijyanye n’iterambere kuko bazatubera nk’umuyoboro tunyuzamo amakuru.”

Abikorera bishyize hamwe muri uyu murenge wa Kansi, ni 127. Uyu mubare kandi nawo ngo uziyongera nk’uko inyandiko y’umuhigo wa 2013/2014 w’aba bikorera ubigaragaza.

Clarisse Umuhire