Nubwo abaturage bamaze kubigezwaho bakabyishimira, ubuyobozi bw’Akarere ka Gatsibo buvuga ko bidahagije bukabasaba ko nabo bashyiraho akabo mu kubibungabunga; bakabigira ibyabo, byakwangirika bagatanga umusanzu mu kubisana byaba ngombwa bagasaba n’ubuyobozi kubunganira.

Umuyobozi w’Akarere ka Gatsibo wungirije ushinzwe ubukungu n’iterambere, Habarurema Isaie aganira na Kigali today yavuze ko hari aho usanga babyangiza, bakumva ko ubwo byatanzwe na Leta cyangwa abandi bafatanyabikorwa bazongera bakabaha ibindi.

Ati: “Ibyo ni ingeso mbi ikwiye gucika abaturage tubabwira ko iyo byangiritse ari igihombo baba bagize, kuko hari igihe no kongera kubona ibindi bigorana”.

Habarurema Isaie Umuyobozi w’Akarere ka Gatsibo wungirije uhinzwe ubukungu n’iterambere.

Habarurema akomeza avuga ko abafatanyabikorwa b’Akarere na bo bakunze kugaragaza uruhare mu gufasha abaturage kugira ubuzima bwiza, bakagaragaza ubufatanye mu kwegereza abo baturage ibikorwaremezo, akavuga ko byaba byiza bagiye banahugura abaturage bakabigisha akamaro k’ibikorwa babegereje n’uko bagomba kubyitaho.

Ubuyobozi bw’Akarere kandi buvuga ko ari ngombwa kwamagana no gukumira ubujura. Ibi ngo byagiye bigaragara cyane nko ku bikorwaremezo by’amashanyarazi, aho bijya byibwa ugasanga nk’umudugudu wose umaze igihe utabona amashanyarazi, ngo hakwiye ubufatanye bw’abaturage n’abashinzwe umutekano mu gukumira abanzi b’iterambere.

Benjamin Nyandwi