Ibi minisitiri Kanimba yabitangaje nyuma yo kuganira n’inzego zitandukanye zikurikirana gahunda ya Hanga Umurimo mu karere ka Nyamagabe, amabanki, abajyanama mu bucuruzi ndetse n’abagannye iyi gahunda bagatanga ubuhamya bw’ibyo bamaze kugeraho, kuri uyu wa gatatu tariki 19/06/2013.

Minisitiri ushinzwe ubucuruzi n’inganda atangaza ko usanga gahunda ya Hanga Umurimo itari mu bikorwa byoroheje nko kudandaza ibicuruzwa byoroheje, ahubwo inagaragara mu nganda nto n’iziciriritse zongerera agaciro umusaruro w’umutungo kamere cyangwa se ibikomoka ku buhinzi, iki nacyo ngo kikaba ari icyo kwishimirwa.

Ati: “Ntabwo tukivuga ibikorwa byo kujya kurangura imyunyu n’isukari ukadandaza. Ni imishinga y’inganda nto n’iziciriritse iri kongera agaciro umutungo kamere w’u Rwanda n’uturuka ku buhinzi n’ubworozi cyangwa undi musaruro”.

Mu gihe icyiciro cya mbere cya Hanga Umurimo cyafatwaga nk’igerageza cyasojwe hakaba hari gukorwa icya kabiri, Minisitiri Kanimba avuga ko hari imbogamizi zagiye zigaragara muri iyi gahunda nko kuba banki zaragiye zitanga amafaranga make ugereranyije n’umushinga ugiye gukorwa, akaba avuga ko bagiye kurebera hamwe uko amabanki yaha andi mafaranga imishinga bigaragara ko yahawe make kandi ifatika bityo ntisenyuke ikiri kuvuka.

Mu cyiciro cya mbere cya Hanga Umurimo, mu karere ka Nyamagabe hatanzwe inguzanyo ya miliyoni 151 ku mishinga itanu irimo uruganda rutunganya ibikomoka ku ngurube n’isarumara ya kijyambere, indi mishinga icyenda ikaba igitegereje guhabwa inguzanyo.

Zimwe mu ntego za Hanga Umurimo harimo gutinyura abantu kwihangira imirimo no kubafasha, biciye mu marushanwa yo gutekereza imishinga ibyara inyungu, hibandwa mu guhanga udushya.

Emmanuel Nshimiyimana