Aba bashoramari bayobowe na Dr. Al-Mohamed Barwani batangaje kandi ko basanzwe kandi bafite ubushobozi bwo gushora imari mu bijyanye no kwakira abantu nko kubaka ama hoteli ndetse n’ubukerarugendo.

Minisitiri w’Intebe yabashimiye uburyo bahisemo kuza mu Rwanda abizeza ubufatanye n’ubufasha ku rwego rwa Guverinoma kugira ngo ishoramari ryabo rikorwe kuburyo bunoze.

Nyuma yo kubonana na Minisitiri w’Intebe, uyobora akaba na nyiri MB Holding Company, Dr. Al-Mohamed Barwani, yatangarije abanyamakuru ko agiye gusubira iwabo akohereza inzobere zizaza kwiga neza uko iryo shoramari ryakorwa.

Minisitiri w’Intebe mu biganiro n’abashoramari bo muri Oman.

Dr. Mohamed yatangaje ko yifuje gushora imari mu Rwanda kuko ari igihugu gitekanye gifite amahoro, kandi kitabamo ruswa, kikaba ari igihugu gitera imbere kandi gifite isuku.

Uyu mushoramari ngo amaze gushora imari ye mu bihugu bitandukanye ku mugabane w’Uburayi, muri Aziya yo hagati ndetse no muri Afurika aho afite ibikorwa muri Tanzania, Namibia ndetse na Afurika y’Epfo.

Umuyobozi w’agateganyo w’ikigo cy’igihugu cy’iterambere (RDB) yatangaje ko aba bashoramari bafite byinshi bashoramo imari mu gihugu cyacu nko mu rwego rwo kongera amashanyarazi aho bashobora gucukura gaz ndetse na petrol, bakaba rero bari mu biganiro mu rwego rwo kunoza iryo shoramari.

Egide Kayiranga