Bamwe muri abo basoreshwa baganiriye na Kigali Today bavuga ko usanga basoreshwa amafaranga arenze ubushobozi bw’ibyo bakora cyane ko ngo baba babikora ari ukwirwanaho akenshi usanga atari ubucuruzi bugaragara.

Ikibazo bavuga ngo ni nko kuba usanga umuntu runaka ukora akazi koroheje ko kumutunga gusa ugasanga asoreshwa kimwe n’umucuruzi ukomeye winjiza menshi.

Hategeka ni umusore ukiri muto ukora umurimo w’ubwogoshi mu isantre ya Kinini iherereye mu murenge wa Rusiga, yabwiye Kigali Today ko ku bwe asanga uburyo imisoro itangwa bikwiye gusubirwamo ngo kuko byasubiza benshi ku isuka kandi Leta ibasaba kwihanagira imirimo.

Yagize ati “Njye umwuga wanjye ni ukogosha kandi nta mafranga menshi navuga ko mbikuramo uretse kwishakishiriza ngo ntiba cyangwa nkaba nakwicwa n’inzara ariko usanga iyo bagiye kunsoresha banyaka umusoro ungana n’uwo umucuruzi ukomeye muri iyi santre bamwaka, jye nkumva bisa nk’akarengane.”

Gusa yemeza ko umuntu wese ufite icyo akorera mu gihugu cye yakagombye gusora ngo kuko azi neza ko mu misoro ari ho Leta ihera yubaka ibikorwa by’iterambere.

Ariko akavuga ko Leta yari ikwiye kujya ibashyira mu byiciro mu gihe cyo gusora hagendewe ku bikorwa bya buri muntu n’icyo byinjiza, bityo buri wese agasora akurikije ibikorwa bye n’umusaruro abikuramo, ngo kuko asanga byaca intege bamwe, bakaba bareka gukora ngo biteze imbere, kubera imisoro irenze ubushobozi.

Uyu musoreshwa avuga ko kuba ari bo Rwanda rw’ejo bakwiye kuborohereza ku bijyanye n’imisoro, bityo nabo bakabasha kwizamura no kuzamura igihugu cyabo byihuse mu iterambere bafatanije n’ubuyobozi bwabo.

Sindayigaya Emmanuel, umwakirizi w’imisoro n’amahoro mu karere ka Rulindo, avuga ko kuba bishyuzwa kimwe ari byo ngo kuko ni ko itegeko rimeze.

Yagize ati “yeee ni byo bishyura kimwe kuko itegeko rireba aho bakorera bakishyura kimwe. Ari ipatante ari n’andi mahoro, uretse abakorera mu masoko, abandi bose itegeko riteganya ko harebwa aho bakorera ni ko itegeko riteye”.

Hortense Munyantore