Isoko rya Kabumba, Cyanzarwe, Rugerero, Rubavu na Kanzenze hari amasoko yubatswe ariko abaturage ntibitabira kuyakoreramo bakavuga ko imisoro y’akarere batayibona kuko batabona abaguzi.

Abaguzi bo bavuga ko badacyenera kujya mu masoko mu gihe ibyo bashaka babisanga hafi yabo kandi ku giciro cyiza kurusha icyo mu isoko nubwo bitera igihombo akarere kubaka amasoko ariko ntigashobore kwinjiza imisoro.

Ubu bucuruzi bwo hanze y’amasoko ariko ubuyobozi bw’akarere bukomeje kubwamagana busaba abaturage gukorera mu masoko aho baba barindiwe umutekano.

Nsengiyumva Buntu Ezechiel, umuyobozi w’akarere ka Rubavu wungirije ushinzwe ubukungu n’iterambere, avuga ko kutitabira kurema ayo masoko biterwa ahanini n’imyumvire ikiri hasi hamwe n’abahunga imisoro ya Leta.

Mu karere ka Rubavu abaturage ntibitabira amasoko kubera ingeso yo gucururiza mu ngo aho bamwe mu baturage bagenda bazenguruka mu ngo n’ibicuruzwa abashaka bakagura batavuye mu ngo bigatuma abajya mu masoko batabona abaguzi.

Mu mujyi wa Gisenyi ku gihe cy’amasaha y’umugoroba nibwo ubucuruzi bw’imyenda n’inkweto bishyirwa ku muhanda naho ku manywa abacuruza ibiribwa bakazenguruka, ibi bikorwa byo gucururiza mu ngo kandi Abanyarwanda bakunze kubikora no mu mujyi wa Goma mu gihe Abanyecongo badashobora kubikora mu Rwanda bigatera amakimbirane.

Sylidio Sebuharara