RRA ariko iravuga ko itazongera gusubika igihe cyo gutangira kuzikoresha ku bacuruzi bose, ndetse no gutanga ibihano ku bataragura izo mashini bikaba bitazasubikwa, kandi ko muri uku kwezi kwa Werurwe basabwa ubwoko bw’imisoro butandukanye.

Abayobozi ba RRA, Mukashyaka Drocella (ibumoso) ushinzwe imisoro na Richard Tusabe (iburyo), umuyobozi mukuru wa RRA mu kiganiro n’abanyamakuru.

Mu bacuruzi 7,500 bategerejweho gutanga umusoro ku nyongeragaciro hakoreshejwe izi mashini za EBM, ngo abagera kuri 2,400 nibo bonyine bamaze kuzigura, kandi igihe ntarengwa cyatanzwe ari tariki ya 31/03/2014. Abazaba badakoresha izo mashini bazahanwa bikomeye, nk’uko RRA iburira abacuruzi.

Aganira n’abanyamakuru kuwa kane tariki ya 20/03/2014, komiseri Mukuru wa RRA, Richard Tusabe yagize ati “Hasigaye iminsi 10 gusa ngo abacuruzi bose babe batangiye gukoresha EBM. Ubu tubona ko ari 32% gusa bamaze kuzifata, ntabwo ari umubare ushimishije na gato n’ubwo bose bashobora kugura izo mashini ku munota wa nyuma.”

Komiseri mukuru wa RRA yagize ati “Ingaruka ziriho kandi zirakaze ku batazazikoresha bose kandi abazazigura batinze bashobora kuzazikoresha nabi igihe batabona igihe gihagije cyo guhugurirwa kuzikoresha kubera icyo gitutu kandi nabyo birahanirwa ku mucuruzi wese uyikoresheje nabi.”

Itegeko rivuga ko udakoresha EBM, uwangiza nkana imikorere y’iyo mashini, cyangwa utamenyekanisha neza uburyo yatanze imisoro acibwa ihazabu y’amafaranga kuva ku bihumbi 500 kugeza kuri miliyoni 20 z’amafaranga y’u Rwanda hakurikijwe icyiciro cy’ubucuruzi buri mucuruzi abarizwamo.

Ubu ni bumwe mu bwoko bwa EBM abacuruzi bari gusabwa gutangira gukoresha mu gutanga inyemezabuguzi no kumenyekanisha umusoro.

Komiseri Tusabe yakomeje agira ati: “Abacuruzi bose barigishijwe, barasobanuriwe bihagije, uzabihakana cyangwa akabyirengagiza azaba yigiza nkana.” Imibare ya RRA iragaragaza ko abacuruzi badandaza bo mu ntara aribo baguze imashini za EBM ari benshi kurusha abacuruzi bo mu mujyi wa Kigali baranguza.

Muri Werurwe abacuruzi barasabwa gutanga imisoro itandukanye

Ikigo cya RRA cyibukije kandi ko nta kurenza ukwezi kwa gatatu batararangiza gutanga umusoro ku nyungu w’umwaka ushize, umusoro w’ipatante, umusoro ku mutungo utimukanwa hamwe n’umusoro ku bukode bw’amazu.

Imisoro y’ipatante, itangwa ku mutungo utimukanwa hamwe n’iy’ubukode bw’amazu yatangiye kwishyuzwa na RRA aho kuba mu nshingano z’uturere. Ibi ngo bizatuma uturere dushobora guhigura imihigo y’imisoro twiyemeje kugeraho, nk’uko RRA ibisobanura.

U Rwanda rurashaka ko umusaruro w’imbere mu gihugu wunganira ingengo y’imari y’uyu mwaka ku kigero cya 60%, asigaye 40% akaba yaturuka ku baza gushora imari mu gihugu, ku nkunga ndetse no ku nguzanyo.

Simon Kamuzinzi