Muri Club yiswe “The Bright Way” bibumbiyemo, iyo ubasuye usanga ku wa kabiri no ku wa gatanu wa buri cyumweru bakora amasabune bagatera amabara mu myenda ndetse ubu batangiye no kwiga uko bakora amavuta asigwa mu misatsi y’abagore azwi ku izina rya Champoon.

Bamwe mu bakobwa bavuga ko babyariye iwabo nyuma bagahitamo kwihangira umurimo bibumbiye hamwe.

Nk’uko ubwabo babitangamo ubuhamya ngo mbere nta kintu babaga bahugiyeho usibye guhora batakambira ababateye inda nabwo abenshi bakabima amatwi ntubagire icyo babafasha mu burezi bw’abo bana babyaranye.

Ubu buzima bubabaje bavuga ko babubayemo igihe kinini ndese abenshi bikabaviramo guta ishuli ngo nicyo cyatumye bashaka uko bibumbira hamwe babifashijwemo n’uwitwa Benegusenga Aimé Noel, bavuga ko ariwe wabagiriye inama yo gukorera hamwe nk’abantu bafite ibibazo by’ingutu byari bibakomereye.

Bakimara guhitamo gukora amasabune n’ibindi mu rwego rwo gushakisha icyatuma batandagara kimwe nabo babyaye ubu baravuga ko batangiye kwigirira icyizere cyiza cy’ejo hazaza, nyuma yo kubona ko ibyo bakora bizakundwa nibigera ku isoko ry’abaguzi.

Ubu bushake n’umuhati wabo wo gushaka gukorera hamwe watumye nyuma y’amezi make babona umuterankunga witwa Action Aid International ubatera inkunga ingana n’ibihumbi Magana icyenda y’u Rwanda yo kugura ibikoresho biciriritse byo kwifashishwa muri icyo gikorwa cyo kwihangira imirimo batangiye.

Nk’uko aba bakobwa babyariye iwabo bakomeza babitangaza ngo ibyo bakora kugeza n’ubu ntibirajya ku isoko kubera ko bitarapimwa n’ikigo cy’igihugu gishinzwe iby’ubuziranenge.
Mu Ntangiriro z’ukwezi kwa 10/2014 nibwo biyemeje kuzajya gukoresha ubugenzuzi bw’ibikorwa byabo bifashishije impuguke ituruka mu gihugu cya Uganda ari nayo ibigisha uko bakora ibyo bikorwa byabo byose.

Uwizera Jeanne umwe mu bakobwa bibumbiye muri iyi Club igizwe ahanini n’abakobwa babyariye iwabo avuga ko mu guhe gito gishize ayigezemo asanga izazana impinduka mu buzima bwe bwa buri munsi bugatandukana n’ubwo yarimo atarisungana na bagenzi be.

Benegusenga Aime Noel perezida w’iyi Club avuga ko n’ubwo ubushobozi bw’abayigize bukuri buto cyane ngo bafite gahunda yo kuzayihindura koperative kugira ngo yagure ibikorwa byayo ndetse inamenyekane mu buyobozi ngo nk’uko abanyamuryango bayo babyiyemeje.

Usibye kuba iyi club ikora iyi miromo yo gukora amasabune n’ibindi banavuga ko bagaragara mu bikorwa bitandukanye byo kurwanya ihohoterwa rishingiye ku gitsina, kurwanya no gukumira ubwandu bw’agakoko gatera SIDA n’izindi gahunda.

Jean Pierre Twizeyeyezu