Iyi nzoga ikoze mu buryo uyisomyeho yumva iri hagati y’iyindi nzoga bita Turbo King na Guinness, nk’uko byatangajwe na Johan De Smet-Van Damme, umuyobozi uhagarariye uruganda BMC (Braselie de Milles Colines).

Umuyobozi wa Brasserie des Milles Collines yashize inzoga ya Virunga Mist ku mugaragaro.

Van Dam yatanagje ko akigera mu Rwanda yasanze inzoga zifite ibara ryijimye zikunzwe cyane mu Rwanda ariko ikibazo kikaba ko inzoga za Bralirwa zidakunzwe kubera abantu bakeka ko ari iza macye, mu gihe abandi badakunda Guiness kubera uburyo isa n’isharira.

Yagize ati: “Twararebye dusanga dushobora gukora ikinyobwa kiri hagati y’ibyo byose. Niho twahise dukora iyi nzoga ifite ubukana bwa 6.5% ku buryo iyo unyweye ihagije uba umeze nk’uri mu gihu cyo mu birunga.”

Inzoga nshya ya Virunga Mist iri mu bwoko bw’inzoga zijimye ariko yo ngo nta sukari irimo.

Yavuze kandi ko impamvu bahisemo kuyita Virunga, wari ukugira ngo Abanyarwanda bamenye ko ari inzoga ikorerwa iwabo.

Bamwe mu bakunzi b’inzoga bahise bishimira iki kinyobwa bavuga ko kije kongera ubundi buryohe mu nzoga zisanzwe ziri mu Rwanda, nk’uko byatangajwe n’uwitwa Jean Marie Vianney Rutayisire.

Ati: “Nkurikije uko maze kuyumva n’ubwo ntarayinwa cyane nta buryohe burimo bw’isukari. Ubwo rero hagati aho nkumva ko itandukanye n’izindi ziba zirimo amasukari. Nzajya nyifatanya na Skol isanzwe kuko ariyo nari nsanzwe nywa”.

Abitabiriye umuhango wo kumurika Virunga Mist ku mugaragaro bishimiye uburyohe bwayo.

Mu myaka ibiri uruganda Brasserie des Milles Collines rumaze mu Rwanda rutangaza ko rwamaze kugera ku isoko ijana ku ijana babikesha kuba inzoga zabo nta masukari abamo, ku buryo n’abarwayi ba diyabete bashobora kuzinywa.

Emmanuel N. Hitimana