Ministiri w’Intebe, Dr Pierre Damien Habumuremyi, yavuze ko akamaro k’imurikagurisha, ari ugufasha kumenyekanisha u Rwanda, aho kuri ubu ibihugu 22 byo ku migabane yose igize isi byaryitabiriye, rigafasha Abanyarwanda kwagura umubano mu bucuruzi, rikanatanga urubuga ku Banyarwanda rwo kwigira ku banyamahanga ubumenyi badafite.

Atangiza iryo murikagurisha ku mugaragaro ku mugoroba wa tariki 25/07/2013, Ministiri w’Intebe yagize ati: “Nimwige ariko ntimwigane, kandi muzarushe abo mwigiyeho, mwerekane indangagaciro zo kwakira abanyamahanga neza hamwe no gutanga servisi nziza muri rusange!”

Yasabye abikorera b’abanyamahanga gukorana n’Abanyarwanda mu bijyanye no guteza imbere inganda nto n’iziciritse; cyane cyane mu ngufu, ikoranabuhanga, ubucukuzi, ubuhinzi ubwubatsi, amahoteli n’ubukerarugendo.

Ministiri w’Intebe yemereye abikorera ko mu myaka ibiri iri imbere, ahabera imurikagurisha hazaba hashyizwe inyubako zujuje ibipimo mpuzamahanga, ku buryo hazajya habera imurikagurisha inshuro nyinshi mu mwaka, aho kuba inshuro imwe gusa.

“Hazajya hakorerwa imurikagurisha mu byiciro bitandukanye, aho mu gihe kimwe wahasanga nk’ibikoresho by’ubwubatsi, ikindi gihe hakabera imurika ry’ubuhinzi n’ubworozi,… mbese hazaba hashyushye buri gihe”, nk’uko Ministiri w’inganda n’ubucuruzi, Francois Kanimba yabisobanuye.

Ministiri Kanimba yemeza ko imurikagurisha ari igipimo cyo kugenzura uko ubukungu bw’igihugu buzamuka, aho ashima umubare w’ibihugu 22 byo ku migabane yose y’isi byaryitabiriye, sitandi (stands) 700 zose zikaba zarabonye abazikoreramo, ndetse n’urubyiruko rwinshi ngo rwahaboneye imirimo.

Hannington Namara uyoboye urugaga nyarwanda rw’abikorera (PSF) we yagize ati: “Nta mibare mfite ariko imurikagurisha ry’ubushize ryatwinjirije miliyoni zitari munsi ya 200, abamurika baraza bagacumbika mu mahoteli, ndetse buri mwaka u Rwanda rwakira abashoramari bakomeye babarirwa hagati ya batanu na 10.”

Guverinoma y’u Rwanda imaze gushyiraho itsinda ry’inzobere rihuza abashoramari bo mu Rwanda n’abikorera bo muryango w’ibihugu by’Afurika y’uburasirazuba n’amajyepfo (COMESA), rigamije gufasha inganda zo mu Rwanda kubona ibicuruzwa bikenerwa n’inganda nini zo muri ibyo bihugu, nk’uko byemejwe na Ministiri Kanimba.

Abikorera basabye ubuyobozi bwa PSF kugabanya urusaku rw’umuziki ubabuza kuganira n’abakiriya babo. Umuyobozi wa PSF yavuze ko bazakemura icyo kibazo, mu buryo bwo gushyira abafite imiziki ukwabo, abacuruzi ibindi nabo bakaba ukwabo.

Expo izarangira tariki 08/08/2013 izajya ifungura mu gitondo ifunge saa yine z’ijoro.

Andi mafoto ajyanye n’inkuru:

Simon Kamuzinzi