Akarere ka Ruhango kugeza ubu kabarirwa mu turere dufite umubare munini w’abaturage bakibarirwa munsi y’umurongo w’ubukene.

Abakomoka muri aka karere ariko bakaba bakorera hanze yako, bavuga ko bagiye gushora ibikorwa by’iterambere mu karere bakomakomo kugirango bifashe abahatuye kwizamura.

Bimwe mu bikorwa aba bashoramari bakomoka mu karere ka Ruhango bagiye kuhashora, harimo ubuhinzi, ubucuruzi, amahoteri, uburezi n’ibindi.

Ubuyobozi bw’akarere ka Ruhango nabwo buvuga ko bwiteguye gufasha no korohereza aba bashoramari kugirango nabo ibyo bazaba bashoye bigende neza.

Mbabazi Francois Xavier uyobora akarere ka Ruhango avuga ko kuba bagiye gukorana n’abashoramari bakomoka mu karere abereye umuyobozi ari izindi mbaraga zidasanzwe ku iterambere ry’aka karere.

Izi mpande zombi ziyemeje iyi mikoranire nyuma y’uko akarere ka Ruhango gahawe igikombe n’ikigo cy’igihugu gishinzwe iterambere (RDB) cy’uko gakorana neza n’abashoramari.

Ubuyobozi bw’akarere ka Ruhango kandi bwahize ko mu mwaka 2012-2013 imirayngo 30 itishoboye izubakirwa amazu yo kubamo.

Eric Muvara