Nyuma y’amahugurwa y’icymweru biga kubumba amatarari, abo bafundi bagera kuri 15 n’abakorerabushake 18 baratangaza ko Ubwo bumenyi bahawe, bazabukoresha mu kwiteza imbere no kuzamura Akarere muri rusange.

Mu muhango wo gusoza ayo mahugurwa, Kuri uyu wa Gatanu tariki 03/08/2012, uwari uhagarariye abo babumbyi, yatangaje ko bamenye ko kubumba amatafari bitagomba kubyinira mu cyondo, kuko bishoboka kubumbisha imashini.

Amatafari babumbye bakoresheje imashini.

Niyoyita Come, Umuyobozi w’igenamigambi mu Karere wari uhagarariye Ubuyobozi bw’Akarere, yashimiye MINALOC yateguye icyo gikorwa, gahunda nyinshi zo kuzamura imibereho myiza y’abaturage harimo no kubafasha gutura neza.

Yavuze kandi ko kuba Umurenge wa Kanjongo waratoranijwe gukorerwamo iki gikorwa, ari uko hari igice kinini kiri kuba umujyi. Bizeza ko bazakoresha ayo mahirwe mu gushyira mu bikorwa igishushanyo mbonera cy’umujyi wa Nyamasheke.

Come Niyoyita asobanura uburyo ayo matafari azafasha akarere.

Niyoyita yavuze ko mu rwego rwo gukurikirana izo mashini no kuzikoresha neza, abahuguwe bazafashwa mu gukora Koperative ifite icyerekezo cyo guhuza ababumbyi n’abafundi, kugira ngo bazarusheho kunoza umurimo.

Nkaka Théogène w, intumwa ya MINALOC, yabwiye abahuguwe ko bafite akazi nyuma y’amahugurwa bahawe, kuko ubumenyi buzabafasha kwagura ibitekerezo no gukora neza.

Yavuze ko yababonanye ubushake ari na bwo buzabafasha kubona ubushobozi. Yabasezeranije ko ubushobozi bazagaragaza mu gutanga umusaruro, bakoresheje izo mashini buzatuma bafashwa no mu bindi.

Ayo matafari abumbwa bakoresheje igitaka kivanze n’umucanga, naho amategura agakorwa mu mucanga n’isima. Nyuma yo guhugurwa bazubaka inzu y’icyitegererezo ifite igikoni n’ubwiherero, izahabwa umuturage utishoboye.

Emmanuel Nshimiyimana