Uruganda rutunganya umuceri rwuzuye mu murenge wa Kiziguro, Perezida Kagame yarwemereye abaturage muri 2009 none abaturage bemeza ko imvugo ikomeje kuba ingiro aho ibyo yabemereye bagenda babigeraho bikabafasha kwiteza imbere.

Leta yahisemo kubakira abahinzi b’umuceri baturiye ibishanga bya Kanyonyomba na Ntende uruganda rutunganya umuceri aho gukomeza kuwugurisha ba rwiyemezamirimo biyungukira abaturage ntibabone inyungu ihagije.

Akarere ka Gatsibo kabarirwa mu turere dufite ibishanga binini birimo ibihingwamo umuceri nk’igishanga cya Kanyonyomba gifite hegitari zirenga 400 zitunganyije zihingwamo umuceri zitanga umusaruro ugera kuri toni 2000 naho igishanga cya Ntende cyo cyera toni zirenga 2500.

Uruganda ruzafungurwa na Perezida Kagame ruzatangirana no gutunganya umuceri weze mu bishanya bya Kanyonyomba na Ntende. ruFite ubushobozi bwo gutunganya toni 3 n’igice mu isaha imwe ndetse n’ububiko bushobora kwakira toni zirenga 4000.

Uruganda rumaze kuzura, aha rwari rwasuwe na Guverineri w’intara y’Uburasirazuba, Uwamariya Odette

Biboneka ko umusaruro w’umuceri ukwiye kwiyongera kugira ngo urwo ruganda ruzabone icyo rukora. Icyari ikibazo ku bahinzi b’umuceri kwari ukubona uruganda rutunganya umusaruro wabo, ariko kibona uruganda birabasigira ihurizo ryo kongera umusaruro w’umuceri kugira uruganda rutazabura akazi.

Umucungamari wa koperative y’abahinzi b’umuceri mu gishanga cya Kanyonyomba asobanura uko biteguye gukoresha uru ruganda no kurubyaza umusaruro muri aya magambo: “umuceri twawuherezaga ba rwiyemezamirimo bakajya kwiyungukira ariko ubu inyungu igiye kujya mu bahinzi, ikindi nuko tuzaguramo imigabane ariko icyiza kurusha ni uko umuhinzi azashobora kurya umuceri yihingiye.”

Ikibazo cyo guhinga umuceri ukajya gutunganyirizwa ahandi ukagaruka uhenze biri mu bibangamira abaturage bahinga mu bishanga bya Kanyonyomba na Ntende, kuba bazashobora kurya umuceri bihingiye ngo bizabashimisha.

Sylidio Sebuharara