Umuyobozi wa koperative COMORU, Sibomana Haruna, avuga ko igitekerezo cyaturutse ku nama bagiriwe n’ubuyobozi bw’akarere ka Rusizi mu kwezi gushize, aho basabwaga gutekereza ku kindi cyabafasha kwiteza imbere kitari ugutwara abagenzi kuri moto gusa.

Nk’uko akomeza abivuga ngo mu nama bagiranye n’abanyamuryango basanze koko bifitemo ubushobozi, batabyazaga umusaruro, bityo bahitamo gukora igikorwa cyo kubaka inzu y’ubucuruzi.

Umuyobozi w’akarere ka Rusizi, Nzeyimana Oscar, yatangaje ko iki ari igikorwa cyiza, ariko kandi abasaba kurushaho gutekereza n’ibindi byisumbuyeho, kuko igihe bazaba batagishoboye gutwara moto, ibikorwa nk’ibi bizabagoboka mu masaziro yabo n’imiryango yabo.

Igishushanyo mbonera cy’inyubako ya koperative y’abamotari b’i Rusizi.

Mu rwego rwo kwagura umujyi wa Kamembe hatangiye uburyo bwo gushyira ibikorwa by’amajyambere hirya no hino nko gutunganya icyambu cya Muhari, site zo guturamo i Shagasha na Karushaririza kimwe na Murangi, kandi abasaba kuja barangwa n’ubufatanye n’ubunyangamugayo.

Igikorwa cyo gutwara abagenzi kuri moto mu karere ka Rusizi cyatangiye mu mwaka w’1998 bikorwa n’ishyirahamwe AMOCYA; mu mwaka 2009 rihinduka koperative COMORU n’abanyamuryango 142, ariko kugeza ubu ifite abagera kuri 467.

Ikibanza kizubakwamo iyo nzu gifite agaciro ka miliyoni 20.

COMORU ifite moto zigera kuri 30 n’ikibanza gifite agaciro ka miliyoni 20 kigiye kubakwamo inzu y’igorofa. Umuyobozi w’Akarere ka Rusizi akaba yabijeje ko akarere kazabashakira inkunga yo kubunganira.

Igikorwa cyo kubaka iyo nyubako cyatangijwe n’umuyobozi w’akarere ka Rusizi, wari kumwe n’umuyobozi w’akarere wungirije ushinzwe ubukungu, Marcel Habyarimana, umuyobozi w’ingabo mu karere ka Rusizi, Major Safari, umukozi ushinzwe amakoperative mu karere ndetse n’umuyobozi w’urugaga rw’abikorera.

Musabwa Euprem