Nyamasheke: Uruganda rw’icyayi rwa Gatare rushobora kutazuzurira igihe

14-02-2012 - 15:54' | Ibitekerezo ( )

Imirimo yo kubaka uruganda rw’ umushinga w’icyayi wa Gatare ku nkengero z’ishyamba rya Nyungwe mu mirenge ya Cyato na Karambi yagomba kurangira mu Kuboza 2012 ariko ngo bishoboka ko rutazaba rurangiye kubera imbogamizi z’umuhanda ndetse n’amashanyarazi.

Ibi byatangarijwe Minisitiri w’Intebe tariki 11/02/2012 ubwo yasuraga uyu mushinga uri mu mu mudugudu wa Rubyiruko, akagari ka Rushyarara mu murenge wa Karambi mu karere ka Nyamasheke.

Minisitiri w’Intebe yasabye ikigo gishinzwe gukwirakwiza amazi n’amashanyarazi (EWSA) kwihutisha imirimo y’ingufu z’amashanyarazi na byo bikazarangirana n’ukwezi kwa 12/2012.

Yasabye ko hakorwa inyigo y’umuhanda Hanika-Karambi, ari nawo ujya aho uru ruganda ruri kubakwa, mu gihe kitarenze icyumweru ikoherezwa muri Minisiteri y’Ibikorwa Remezo, kugira ngo harebwe uko uyu muhanda wakorwa bitarenze mu kwa 12 k’uyu mwaka.

Emmanuel Nshimiyimana