Kuri ubu ikiro cy’ikawa ya Shangi kiragurwa amadorari 45 ni ukuvuga asaga ibihumbi 30 by’amafaranga y’u Rwanda ku isoko mpuzamahanga. Ibi bikaba bitangazwa n’ushinzwe gukurikirana kawa ntara y’i Burengerazuba, Kayiranga Innocent.

Kayiranga avuga ko igihe cy’umwero w’ikawa cyegereje ari igihe cyo gukora bakazasarura ikawa yeze neza, kandi bakayijyana ku ruganda igifite umwimerere bityo bakareba uko umwanya wa mbere bafite bawugumana.

Yagize ati “bizashoboka inzego zose nizibigiramo uruhare, abanyenganda, abahinzi n’abayobozi bagaca utumashini duto dutonora nabi kawa tukayangiza, abaturage bakayanika ahantu hatameze neza ikazagera ku ruganda itakigira uburyohe bw’umwimerere.”

Umuyobozi w’akarere wungirije ushinzwe iterambere n’ubukungu, Bahizi Charles avuga kugira ngo bagumane umwanya wa mbere bisaba ubwitange bwa buri muturage mu kurushaho gukurikiza amabwiriza yo gufata neza kawa ariko akavuga bizanatuma ubukungu bwiyongera mu baturage ba Nyamasheke.

Agira ati “iyo abaturage bafashe neza kawa umusaruro uriyongera abaturage bakagira amafaranga mu mifuka yabo bakiteza imbere kandi n’igihugu kikabona amafaranga y’amadovize”.

Ibi yabivuze mu nama yahuje abahinzi , abayobozi n’abanyenganda b’ikawa ba Nyamasheke mu mpera z’iki cyumweru twasoje tariki 16/03/2014.

Nubwo ikawa ya Shangi ikomeje kuhenda mu ruhando mpuzamahanga mu Rwanda naho , igiciro kiziyongera aho biteganyijwe ko kizaba gihagaze ku mafaranga 200 ku kiro cy’ikawa z’ibitumbwe mu gihe umwaka ushize muri sizeni y’ikawa, ikiro cyari amafaranga 140 y’amanyarwanda.

Iki kikaba ari igiciro fatizo umuhinzi atagomba kujya hasi kandi amafaranga ashobora kwiyongera bitewe n’uko sizeni yagenze.

Umugwaneza Jean Claude