Muri uru ruzinduko Minisitiri Kalibata yagiriye inama aha n’impanuro aba baturage ku bireba no gukumira no kurandura burundu indwara ya kirabiranya mu rutoki.

Muri uyu muganda wo gukorera urutoki harwanywa indwara ya kirabiranya Minisitiri Kalibata, yasabye abaturage kwihutira kurandura insina zafashwe n’indwara ya kirabiranya no kwitwararika ku bikoresho bikoreshwa mu gukorera urutoki.

Kirabiranya ni indwara ifata insina ikaba ihangayikishije benshi mu baturage bahinga urutoki bo mu karere ka Nyagatare. Ritararenga Leonard ni umwe muri aba baturage, atuye mu kagari ka Nyamirembe mu murenge wa Gatunda.

Yemeza ko ubusanzwe igitoki cyari kibafatiye runini mu mibereho yabo ya buri munsi. Ariko kubera indwara ya kirabiranya yibasiye insina ubukungu bwabo ngo bwarahungabanye bikabateza igihombo kinini.

Muri uru rugendo kandi Ministre w’ubuhinzi n’ubworozi yasuye igikorwa cyo gukwirakwiza amazi mu nzuri ahamaze kubakwa ibigega 40 kuri 46 biteganyijwe gukwirakwizwa kuri km 287 mu mirenge ya Rwempasha na Tabagwe no mu gace gato k’umurenge wa Musheli n’uwa Rwimiyaga.

Muri iki gikorwa kandi Minisitiri Kalibata yanifatanyije n’abaturage mu gikorwa cyo gutera ibigori mu gishanga cy’Ikirimburi, ahatangirijwe igihembwe cya kabiri cy’umwaka w’ihinga.

Benjamin Nyandwi