Maniragaba agurisha izo Kawa z’igitumbwe ku ruganda ku kiro bamuhera ku giciro kiri hagati y’amafaranga 120 na 150, ku buryo ku mwero ngo ashobora kwinjiza miliyoni eshanu z’amafaranga y’u Rwanda.

Maniragaba Juvenal yinjiza miliyoni enye ku mwero w’ikawa.

Avuga ko akoresha abakozi batanu bahoraho mu ikawa ze, ayo mafaranga yinjiza ni yo amufasha kubishyura ndetse no gukemura ibibazo byo mu rugo.

Mu gihe bamwe mu baturage bagira ikibazo cyo kubona amafaranga yo kwishyurira abana amashuri we si ko bimeze, ngo yishyurira abana babiri kubera ikawa.

Ku bijyanye n’ubwisungane magirirane mu kwivuza buzwi nka mitiweli ngo nta kibazo agira cy’amafaranga. Ati “ Njyewe mitiweli nyitanga mu ba mbere, iyo bavuze mitiweli….kuri njye numva nta kibazo; numva ari ubusabusa.”

Maniragaba yahembwe inka y’inzungu yenda kubyara kubera ikawa.

Yongeraho ko ikawa yamugejeje ku isambu aho amafaranga yakuyemo yayaguze isambu ngo ifite ka miliyoni ebyiri, ayihingamo imyaka itandukanye ndetse n’ibyatsi byo kuzisasira.

Uyu muhinzi w’ikawa yerekanye ko indashyikirwa kuko ikawa ye yitwaye neza mu marushanwa y’ubwiza bw’ikawa [Cup of excellence], ibi bimuhesha igihembo cy’inka y’inzungu ibura iminsi mike ngo ibyare.

Cyakora, umusaruro we ku giti, uracyari hasi kuko ari ku 1.5 cyangwa ibiro 2 ku giti mu gihe ahandi ugeze nibura ibiro bitatu ku giti, inka yahembwe izamuha ifumbire ishobora gutuma yongera umusaruro afumbira biruseho.

Leonard Nshimiyimana