Nyuma y’urwo rugendoshuri rwabaye tariki 14/11/2013, Mpagaritswenimana Vedaste ushinzwe ubuhinzi mu Karere ka Muhanga yatangaje ko bagiye kurushaho gucunga neza amakoperative yabo bityo umusaruro ukarushaho kwiyongera.

Kimwe mu bituma izi Koperative z’abahinzi b’Umuceri mu kibaya cya Bugarama zitera imbere ngo ni imicungire myiza yazo nkuko umukozi w’ikigo cy’Igihugu gishinzwe iterambere ry’amakoperative (RCA) yabitangaje.

Nshunguyika Emmanuel ushinzwe guhuza ibikorwa by’imishinga ya Welthungerlife (Agro Action Allemande) n’inzego z’ubuyobozi mu turere twa Muhanga , Ruhango na Huye yavuze ko uru rugendo shuri ruzabafasha kongera ubushobozi bw’inzego z’ubuyobozi n’inzego z’amakoperative n’imiryango icunga amazi mu bishanga bihingwamo umuceri ku bufatanye n’umushinga WHH.

Ibi kandi ngo bizafasha izi nzego gukurikirana ibikorwa byagezweho cyane cyane nyuma y’isozwa ry’umushinga.

Iri tsinda ryaturutse mu Karere ka Muhanga rigizwe n’abakozi bashinzwe amakoperative mu Mirenge, abashinzwe iterambere mu Tugari dufite ibikorwa mu gishanga gihingwamo umuceri cya Rugeramigozi.

Musabwa Euphrem