Majyalibu Jotham, umuyobozi mukuru wa Rwanda Mountain Tea atangaza ko uruganda rwa Kitabi rufite ubushobozi bwo gutunganya toni 2400 ku mwaka nyamara kugeza ubu ntirunageza ku bihumbi bibiri, hakaba hakenewe ko inzego zinyuranye zifatanya mu gushaka uburyo rwabyazwa umusaruro wose rushobora gutanga.

Ati “uruganda rwa Kitabi amamashini arimo afite ubushobozi bwo kuba yatanga toni 2400 ku mwaka ariko uyu munsi turacyari kuri toni 1800 murumva ko tukiri hasi. Dukeneye rero kugira ngo icyo gihombo tugikuremo uruganda rubyazwe umusaruro”.

Kugira ngo uruganda rw’icyayi rwa Kitabi rubashe kubyazwa umusaruro mu buryo bukwiriye harasabwa kongera ubuso buhinzeho icyayi ndetse n’ubuhinze bugafatwa neza kugira ngo bubashe gutanga umusaruro uko bikwiriye, akaba arirwo rugamba Rwanda Mountain Tea iri kurwana nk’uko Majyalibu akomeza abivuga.

“Hari ukongera ubuso buteyeho icyayi ariko n’ubuso buhinzeho icyayi bugafatwa neza kugira ngo bubashe gutanga umusaruro nyakuri,” Majyalibu.

Karangwa David, Umuyobozi wungirije wa koperative y’abahinzi b’icyayi bakorana n’uruganda rwa Kitabi bakaba banafitemo imigabane ingana na 10% “KOBACYAMU”, atangaza ko nabo bafite gahunda zigamije guteza imbere abanyamuryango babo bongera ubuso buhinzeho icyayi kuko kibafatiye runini ugereranyije n’ibindi bihingwa, ndetse bakaba baranayobotse gukoresha ifumbire y’imborera mu cyayi ngo umusaruro wiyongere kandi ube mwiza kurushaho.

N’ubwo imirima y’icyayi itarabasha guhaza uruganda rwa Kitabi, hatewe intambwe igaragara mu kongera ubuso buteyeho icyayi kuko mu myaka icyenda ishize ubuso buteyeho icyayi cy’uruganda hatabariwemo icy’abaturage bwavuye kuri hegitari 350 ubu zikaba zigeze hafi kuri hegitari 900, urugamba rukaba rukomeje bongera imbaraga mu gukangurira abaturage nabo bakongera ubuso.

Emmanuel Nshimiyimana