Ibi Minisitiri yabihereye ku ko aba bahinzi bahinze kawa mu masambu yabo yose, none ubu izi kawa zikaba zizatangira kwera ku isizeni yo muri uyu mwaka wa 2014.

Minisitiri Musoni ati “musabwa guhinga ikawa mu masambu yanyu kwari ukugira ngo mutere imbere. Ni byiza ko mutangira kumenya uko mucunga umutungo, kuko mu minsi iri imbere muzatangira kubona amafaranga menshi.”

Minisitiri Musoni areba ahari imirima y’ikawa mu murenge wa Simbi mu karere ka Huye.

Yabagiriye inama kandi yo kwita ku ikawa zabo agira ati “ikawa muyifate neza, igiti kijye gitanga umusaruro mwinshi ushoboka.”

Abahinzi ba kawa bo mu Murenge wa Simbi bari mu gace ubu kari guhingwamo kawa ku buryo bufatika bitewe n’uko hazwi kuba hera ikawa iryoshye yamamaye ku isi hose ku izina ry’ikawa ya Maraba.

Mu guhinga izi kawa zabo bagiye babihemberwa amafaranga 1000 ku munsi ndetse bakanemererwa kuzihingamo imyaka itazica zikiri ntoya. Icyakora, ubwo ubu zigeze kuba zakwera, basabwa kuzisasira ntibongere kuzihingamo.

Uyu muhinzi wa Kawa uhagarariye abandi yemeza ko ubu bamaze kumva akamaro ko guhinga kawa mu masambu yabo yose.

Ku ikubitiro abahinzi bamwe ntibemeraga kuba bahinga ikawa ku butaka bafite bwose bwagenwe kuyihingamo, ariko ubu na bo ngo bamaze kubyumva.

Umwe muri bo ati “n’ubundi ubutaka bwacu bwaragundutse, ntibwera indi myaka. N’urutoki ruhari rurabigaragaza (si rwiza ndlr). Nyamara ikawa yo irahera cyane. Dufite icyizere ko ubwo itangiye kwera izatumara ubukene.”

Marie Claire Joyeuse