Iyi nama yitabiriwe n’abaminisitiri batandukanye bafite aho bahurira cyane n’ibikorwa byo guteza imbere ubuhinzi n’ubworozi na ba guverineri bose bo mu Rwanda, yibanze ku cyakorwa mu rwego rwo guhuza imbaraga hagamije kuzamura umusaruro w’ubuhinzi n’ubworozi.

Minisiti w’Ubutegetsi bw’Igihugu, James Musoni, yatangaje ko biyemeje guhuza imbaraga mu kubaka inzego kuva ku rwego rw’igihugu kugeza ku mudugudu, zizafasha gukangurira abaturage ikoreshwa ry’amafumbire n’imbuto no kunoza imihanda igemurira amasoko.

Yagize ati “Kureba uko umusaruro wakwiyongera, uko utegura igihembwe cy’ihinga, abantu bategura imirima bategura imbuto no kureba uburyo uwo musaruro ugera ku masoko. Uburyo iyo mihanda yarushaho kwitabwaho. Iyi nama ni ibyo byombi yasuzumaga byose bigamije iterambere ry’icyaro uko ryarushaho kwihuta.”

Kubaka ubushobozi hagamijwe guhindura imyumvire y’abaturage ku ikoreshwa ry’ifumbire ni kimwe mu bizakurikiranwa na MINALOC n’iy’Ubuhinzi n’Ubworozi. Ikindi ni uko itangwa ry’ifumbire ryamaze kwegurirwa abikorera, nk’uko Minisitiri Agnes Kalibata yabitangaje.

Ati “Amafumbire arahari mu giturage aho abantu bashobora kuyagura icyo tugomba gushyiramo imbaraga ni ukugira ngo abantu duhindure imyumvire, bumve ko ntacyo dutegereje kiva kure kitari hano aho dutuye nk’abaturage.”

Yakomeje avuga ko imbuto nazo zigiye kwegurirwa abacuruzi kugira ngo ntibizongere guca muri MINAGRI no kongera uburyo ubuhinzi n’ubworozi bwabyazwa umusaruro. Ibi bije nyuma y’aho umusaruro w’igihugu wasaga nk’aho wadindiye, nk’uko Minisitiri Kalibata yabyemeje.

Emmanuel N. Hitimana